Жиноят ишлари бўйича Бухоро туман судида олти маротаба фирибгарлик қилиб хулоса чиқармаган ва еттинчи маротаба ҳам шу ишга қўл урган фуқаро иши кўриб чиқилди. Бу ҳақда «Дарё» мухбири Лайло Ҳайитова маълум қилди.
Жиноят ишлари бўйича Бухоро туман суди раиси Нозим Жўраевга кўра, 1983 йил Наманганда туғилган Ч.С. исмли аёл Жанубий Кореяда ишлаб юрган бухоролик фуқаро Шуҳрат Бобоқулов билан «Odnoklassniki.ru» орқали танишган ва унга ўзини Нилуфар Умрзоқова деб таништирган.
Сохта Нилуфар виртуал оламдаги суҳбатдошини 2007 йил кореялик фуқаро билан турмуш қургани ва эрининг Жанубий Корея давлатида автомобилларга эҳтиёт қисмлар ишлаб чиқарадиган заводи борлиги ҳақидаги ёлғонига ишонтиради. Шуҳрат Бобоқуловга турмуш ўртоғи Гулмира Аббосова, укаси Шавкат Бобоқулов, таниши Насиба Раҳматовани эрига тегишли эҳтиёт қисмлар ишлаб чиқарадиган заводга ишга жойлаштиришини айтади.
Шуҳрат Бобоқуловнинг турмуш ўртоғи Гулмира Аббосовани алдаб, Жанубий Кореяга боришлари учун зарур бўлган ҳужжатларни расмийлаштириш эвазига 900 АҚШ доллари миқдорида харажат қилиниши лозимлигини билдирган ва пулларни қўлга киритиб, ўз эҳтиёжи учун сарфлаб юборган. Фуқароларга моддий зарар етказиб, фирибгарлик жиноятини содир этган.
Суд ҳужжатларида қайд этилишича, Ч.С. ўзининг жиноий ҳаракатларини давом эттириб, Гулмира Аббосованинг укаси Жалол Зиёдуллаев ҳамда Достон Бўстоновдан ҳам уларни ишга жойлаштириш учун зарур бўлган ҳужжатларни расмийлаштириш эвазига 600 АҚШ доллари миқдоридаги нақд пулларни алдов йўли билан қўлга киритган.
Суд мажлисида судланувчи айбига иқрор бўлмаса-да, тергов-суриштирув далилларига асосан унинг жиноий қилмиши ўз исботини топган.
Жиноят ишлари бўйича Бухоро туман суди Ч.С.га Жиноят кодекси 168-моддаси (Фирибгарлик) 3-қисмининг «б» бандида назарда тутилган жиноятни содир этганликда айбли деб топилиб, иш ҳақининг ўттиз фоизини давлат даромадига ушлаб қолиш шарти билан 2 йил 6 ой ахлоқ тузатиш ишлари жазоси тайинланган.
Маълумот ўрнида: Судланувчи Ч.С. муқаддам Жиноят ишлари бўйича Шеробод, Яккасарой, Юнусобод, Чилонзор, Сергели туманлари ҳамда Бекобод шаҳар суди томонидан Жиноят кодексининг 168-модда (Фирибгарлик) ва 228-модда (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) каби моддалар билан айбли деб топилиб, жазо тайинланган.
Аввалроқ Наманганда муқаддам саккиз марта судланган аёл ёш қизларнинг тақинчоқларини ўғирлаб яна бир бор жиноят содир этгани ҳақида хабар берилганди.
Изоҳ (0)