Қозоғистоннинг Остона шаҳрида 937 нафар муҳожирни бир хонали квартирага рўйхатдан ўтказган шахс судланди. Бу ҳақда шаҳар прокуратураси матбуот хизматига таяниб “Zakon.kz” хабар берди.
Суд ҳукми билан мазкур хонадон эгаси Жиноят кодексининг 394-моддаси 1-қисми билан айбдор деб топилди, дейилади хабарда.
Пойтахт прокуратураси томонидан миграция қонунчилиги талабларига риоя этилиши юзасидан ўтказилган текширув доирасида умумий майдони 35,7 кв/м бўлган турар жойга 937 нафар киши рўйхатга олинган.
Қайд этилишича, хонадон эгасига ноқонуний миграцияни ташкил этиш бўйича жиноий иш қўзғатилган. Прокурор маҳкумнинг ноқонуний миграцияни ташкил этишда айбдорлигини турар жой билан таъминлаш орқали исботлаган. Суд ҳукми қонуний кучга кирган.
Прокурорлар, шунингдек, сохта манзилларда ва “резина квартиралар”да рўйхатдан ўтган жами 22 минг чет эл фуқаросини аниқлаган. Текширув натижаларига кўра, ҳужжатларни қалбакилаштириш, чегарани ноқонуний кесиб ўтиш, суд ҳужжатларига риоя қилмаслик ва бошқа ҳуқуқбузарликлар бўйича жами 42 та терговга қадар текширувлар ўтказилган.
Изоҳ (0)