Ўзбекистонда бир неча мансабдор ер ажратиб бериш ва ҳужжат ишларини битириш эвазига пора олган пайтда қўлга тушди. Бу ҳақда Давлат хавфсизлик хизмати хабар берди.
Маълум қилинишича, Андижон туман ҳокимининг собиқ ўринбосари, шаҳар статистика бўлими бошлиғи ва яна икки шахс тадбиркордан 150 минг доллар пора олган пайтда ушланган. Улар тадбиркорга “Ипак йўли” эркин иқтисодий зонасидаги 6 гектар ерни аукцион орқали олиб бериш учун жами 600 минг доллар талаб қилган. Ишга ҳозирда хусусий бандлик агентлигида ишлаётган, Рақобат қўмитаси собиқ масъули ҳам алоқадор бўлган. У 11 минг доллар пора олгани аниқланган.
Яна бир порахўрлик иши Андижон вилояти Хонобод шаҳар ҳокими ўринбосари ва аввал судланган хусусий корхона раҳбари иштирокида содир этилган. Улар ўзаро тил бириктириб, 4 гектар ерни аукцион орқали расмийлаштириб бериш эвазига тадбиркордан 20 минг доллар олган вақтда ушланган.
Тошкент вилояти Оҳангарон туманида эса пенсия жамғармаси бўлим бошлиғи фуқарони йўқолган меҳнат дафтарчасини тиклаб, уни ёшга доир пенсияга чиқариб бериш эвазига 1500 доллар пора олган вақтида қўлга тушган. У олдин ҳам жиноят ишлари бўйича судлангани қайд этилган.
Ҳозирда юқоридаги ҳолатлар юзасидан жиноят ишлари қўзғатилиб, барча иштирокчиларга нисбатан қамоқ эҳтиёт чораси қўлланилган. Тергов ҳаракатлари кетмоқда.
Жорий йил 9 июль куни Шароф Рашидов тумани ҳокими ва Гулистон шаҳар прокурори ўринбосари пора олаётганда ушлангани хабар қилинганди. 12 июлда эса Тошкент ва Фарғонада университетлар кафедра ўқитувчилари пора билан қўлга олинган. Мазкур ҳодисага Олий таълим, фан ва инновациялар вазири Қўнғиротбой Шарипов муносабат билдириб, бу мутлақо кечирилмас ва кескин қораловга лойиқ ҳаракатлар эканини, бундай ноқонуний уринишлар бутун олий таълим тизимига доғ туширишини айтган.
Изоҳ (0)