БААнинг Дубай шаҳрида жойлашган Gulf medical university битирувчилари ва шифокорлари Фарғона жамоат саломатлиги тиббиёт институтида Doctor of medicine мутахассислиги бўйича халқаро даражадаги магистратурада ўқийди. Бу ҳақда институт матбуот хизмати хабар берди.
Маълум қилинишича, Фарғона жамоат саломатлиги тиббиёт институти ва Гулф тиббиёт университети (Gulf medical university) билан ҳамкорликда Doctor of medicine (етерапия) мутахассислиги бўйича 4 йиллик магистратура қўшма таълим дастури ташкил этилди.
Икки олийгоҳ ректорлари томонидан имзоланган ҳамкорлик шартномасига кўра, ўқув жараёнига халқаро таълим стандартларга асосланган илғор педагогик технологиялар, ўқув дастурлари ва ўқув-услубий материаллари кенг жорий қилинади, профессор-ўқитувчилар ва талабалар ўртасида маҳорат дарслари ўтказилиб, малака ошириш курсларига университетдан юқори малакали ўқитувчилар ва олимлар фаол жалб қилинади.
Соғлиқни сақлаш вазирлиги, Олий таълим, фан ва инновациялар вазирлиги томонидан келишилган ҳолда тасдиқланган қабул квотасида Doctor of medicine мутахассислиги бўйича Фарғона жамоат саломатлиги тиббиёт институтида 2024/2025-ўқув йилидан 100 нафар бакалавр даражасига эга хорижий фуқароларни магистратура таълим дастурида ўқитиш режалаштирилган.
Магистрлар 1-2-босқичда Problem based learning, 3-4-босқичда эса Workplace-Based Learning таълим технологиялари асосида ўқитилади.
“Аҳамиятлиси шундаки, таълим дастури Буюк Британиянинг The Quality Assurance Agency for Higher Education ташкилоти томонидан халқаро аккредитациядан ўтказилади ва битирувчилар бутун дунёда тан олинадиган халқаро дипломга эга бўлади”, — дейилади хабарда.
Таъкидланишича, тиббиётнинг Doctor of medicine йўналишида магистратура қўшма таълим дастури асосида ўқитиш Ўзбекистонда биринчи марта Фарғона жамоат саломатлиги тиббиёт институтида йўлга қўйилмоқда.
Изоҳ (0)