Англиянинг “Ливерпуль” клуби Мадриднинг “Реал” жамоасида тўп сураётган бразилиялик ҳужумчи Винисиус Жуниорни ўз сафига қўшиб олиш ниятида. Бу ҳақда Испаниянинг Defence Central нашри хабар бермоқда.
Манбага кўра, “қизиллар” 25 ёшли футболчи учун 100 миллион евро асосий тўлов ҳамда 30 миллион евро бонус сифатида таклиф қилиши мумкин. Шу тариқа, трансфернинг умумий қиймати 130 миллион еврога етиши кутилмоқда. Бу эса “Ливерпуль” тарихидаги энг йирик харидлардан бирига айланади.
Аввалроқ ОАВда “Реал Мадрид” Винисиус Жуниорни сотишга тайёр экани ҳақидаги хабарлар тарқалган эди. Ҳозирда футболчининг “қаймоқранглилар” билан шартномаси 2027 йил ёзигача амал қилади. Бироқ унинг жамоадаги келажаги ҳануз мавҳумлигича қолмоқда.
Маълумот учун, Винисиус 2024/25 йилги мавсум “Реал” сафида 58 та ўйинда майдонга тушиб, ўз ҳисобига 22 та гол ва 19 та голли узатма ёздириб қўйган. Transfermarkt портали футболчининг қийматини 170 миллион еврога баҳоламоқда.
Изоҳ (0)