Фарғона вилояти Тошлоқ туманида ўзганинг пулини ўзлаштирган вояга етмаган шахсга нисбатан ҳукм ўқилди, дея хабар бермоқда ЎзА.
Қайд этилишича, Жиноят ишлари бўйича Тошлоқ туман суди томонидан Жиноят кодекси 169-моддаси 3-қисмининг «б» банди (компьютер тизимига рухсатсиз кириб, содир этилган ўғрилик) билан вояга етмаган А.Х.ни айблаш ҳақидаги жиноят иши кўриб чиқилди. Вояга етмаган бу ўсмир 11-сонли мактабнинг 11-синф ўқувчиси, мактабда аъло баҳоларга ўқиб келган, ўқиш жойидан ижобий тавсифланган.
Иш ҳолатига кўра, вояга етмаган А.Х. ўзганинг мол-мулкини яширин равишда талон-торож қилиш мақсадида А.Р.га тегишли бўлган пластик картасини ўзи фойдаланиб келаётган Huawei 9 русумли телефон аппаратидаги «Бепул» иловасига рўйхатдан ўтказиб олган.
Мазкур пластик картада мавжуд бўлган 1 миллион 529 минг сўм пул маблағларини 2020 йил сентябрь ойида бўлиб-бўлиб қариндоши Ҳ.А.га тегишли бўлган пластик картага ўтказиб, ўз эҳтиёжларига сарфлаб юборган.
Судланувчи суд мажлисида ўғирланган пулларни 1XBET интернет ўйинига тикиб юборгани, шу ўйинга ўрганиб қолгани сабабли оқибатини тушунмай жиноят содир этиб қўйганини, қилмишидан қаттиқ пушаймонлигини билдирган.
Суд судланувчининг айбига тўлиқ иқрорлиги ва қилмишидан пушаймонлиги, муқаддам судланмаганлиги, ўқиш жойидан ижобий тавсифлангани, жабрланувчига етказилган моддий зарар қопланганлиги ва вояга етмаганлигини ҳисобга олиб, аслида мазкур жиноят учун қонунда фақатгина озодликдан маҳрум қилиш жазоси тайинланиши белгиланган бўлса-да, Жиноят кодексининг 57-моддасини қўллаб, кодекснинг 841-моддаси тартибида бир йил озодликни чеклаш жазоси тайинлади. Унинг зиммасига сутканинг соат 20:00 дан соат 06:00 гача бўлган вақтида яшаш жойидан чиқмаслик ва назорат қилувчи органнинг розилигисиз яшаш жойини ўзгартирмаслик, Фарғона вилояти ҳудудидан ташқарига чиқмаслик каби қўшимча тақиқлар юкланди.
Бундан аввал Тошкентда банкоматдан 82 миллион сўм ўғирлашга уринган 26 ёшли йигит қўлга олингани, Каттақўрғон шаҳрида дўкондан 8 миллион сўмлик телефонларни ўғирлаган жиноий гуруҳ қўлга олингани ҳамда Тошкент шаҳри ва вилоятида 30 га яқин автомобилни талон-торож қилган гуруҳ ушлангани ҳақида хабар берилганди.
Изоҳ (0)