Сирдарё вилояти Сирдарё туман судида МИБ ходимини уриб, тан жароҳат етказган ота-ўғил судланди, дея хабар беради туман ҳокимлиги ахборот хизмати.
Маълум қилинишича, 2020 йил 20 февраль куни соат 15:30 ларда Мажбурий ижро бюросининг Сирдарё туман бўлими давлат ижрочилари С.Қ. ва А.К. фуқаролик ишлари бўйича Сирдарё туманлараро судининг 2019 йил 18 июндаги ижро варақасига кўра, «Дўстлик» маҳалла фуқаролар йиғинида яшовчи фуқаро Л.Ж.нинг 5 миллион 500 минг сўм кредитдан бўлган қарздорлигини ундириш мақсадида яшаш хонадонига келган.
Л.Ж.нинг турмуш ўртоғи Б.Р. ва ўғли З.М. қарздорликни ундира олмаслигини айтиб, ижро ҳужжатини С.Қ.ни қўлидан олиб қўйиб, ғижимлаб отиб юборган. Сўнгра ҳокимият вакилига фаол қаршилик кўрсатиб, уни ҳақорат қилиб, уриб, тан жароҳати етказилган.
Б.Р. ва З.М.га Ўзбекистон Республикаси Жиноят кодексининг 219-моддаси 2-қисми (Хизмат вазифасини бажараётган ҳокимият вакилини қандай шаклда бўлмасин, ўзининг хизмат вазифасини бажариш ёки фуқаровий бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилиш) билан жиноят иши очилган.
Суд жиноят ишидаги тўпланган далиллар, судланувчилар, жабрланувчилар ва гувоҳларнинг кўрсатмаларига баҳо бериб, тарафларнинг музокаралари ҳамда судланувчиларнинг охирги сўзларини тинглаб, судланувчилар Б.Р. ва З.М. ҳокимият вакилига қаршилик кўрсатиш жиноятини қасддан содир қилгани аниқланган.
Жиноят ишлари бўйича Сирдарё туман суди томонидан судланувчиларга нисбатан қонуний жазо тайинланган.
Аввалроқ Самарқанд вилоятида МИБ ходимларини ёқиб юборишга уринган аёл қўлга олиниб, унга суд ҳукми ўқилган эди.
Изоҳ (0)