Тинч океанининг марказий қисмида 3 мингга яқин автомобиль, жумладан, 800 га яқин электромобиль олиб кетаётган Morning Midas юк кемасида ёнғин чиқди. Бу ҳақда Bloomberg хабар берди.
Ҳодиса Адак оролидан (Аляска) 480 километр жанубда содир бўлган. Юк Мексикага олиб кетилаётгани маълум қилинган. Тутун палубалардан бирида пайдо бўлган. Бортдаги 22 кишининг бари эвакуация қилинган.
Экипаж ёнғинни ўчиришга ҳаракат қилди, бироқ вазиятни назоратга олишнинг иложи бўлмади, дейилади баёнотда.
Юк эгаларининг номлари ошкор этилмаган. Ёнғин сабаблари ҳам маълум эмас. 46,8 минг тонналик бу кема 2006 йилда Хитойдаги Хiamen Shipbuilding кемасозлик заводида қурилган. У Либерия байроғи остида 26 май куни Хитойнинг Шандун провинциясидан йўлга чиққан ва режа бўйича 15 июнь куни Мексиканинг Ласаро-Карденас портига етиб бориши керак эди.
Allianz ҳисоботига кўра, литий-ион аккумуляторлар айниқса йирик автомобиль ташувчи кемалар учун янги хавф-хатарлар туғдирмоқда. Электромобильлар билан боғлиқ ёнғинларни ўчириш қийинроқ бўлади, чунки уларнинг иссиқлик даражаси юқори, палубалардаги шамоллатиш эса чекланган.
Кеманинг пўлат конструкцияси ёнғин ўчириш ишларини мураккаблаштиради ва экипаж учун хавфни оширади, дея қайд этади нашр.
Изоҳ (0)