Россия Шимолий Америка давлатлари чегаралари яқинида баҳорда тўхтатган ҳаво патруллигини қайта тиклади. Бу ҳақда Global News хабар берди.
Маълум қилинишича, Россия сувости кемалари қитъа қирғоқларида денгиз патрулларини ўтказмоқда. Шимолий Америка аэрокосмик мудофаа қўмондонлиги бошлиғи ўринбосари, канадалик генерал-лейтенант Ален Пеллете бу бўйича маълумот берган.
«Бу йил АҚШ ва Канада қирғоқларидаги самолётлар ҳамда сувости кемалари сони қисқарганини кўрмоқдамиз. Бироқ патруллик фаолиятининг баъзилари қайта тикланди. Бу узоқ масофали авиациядан фойдаланиш билан чекланмайди. Россия ҳозирда Атлантика ва Тинч океани соҳилларида сувости кемаларидан ўзининг стратегик имкониятларини намойиш этиш ва Шимолий Америкага хавф туғдириш учун фойдаланмоқда», — деди Пеллете.
Шу билан бирга, у Россия Арктика орқали минтақага узоқ масофали бомбардимончи самолётларни юбораётганини айтди. Канадалик генерал Россиянинг Шимолий Америка атрофидаги ҳаракатлари ҳақида қўшимча маълумот бермади. Бироқ октябрь ойида АҚШ ҳаво кучлари Аляска яқинида Россиянинг иккита бомбардимончи самолётини кузатиб боргани, аммо авиатехника Америка ҳаво ҳудудига кирмаганини эслатди.
Январь ойида Россия Арктикада кенг кўламли ҳарбий машғулотларни бошлаганди. Машғулотларда иштирок этиш учун 1200 нафаргача шахсий таркиб, 140 га яқин ҳарбий ва махсус техника, 20 тагача учувчи аппарат, 30 тагача кема, сувости кемалари ва ёрдамчи кемалар жалб қилинганди.
Изоҳ (0)