Туркиянинг STM мудофаа компанияси Малайзия қироллик денгиз кучлари учун ADA синфига мансуб учта корвет қурилишига старт берди. Истанбулда бўлиб ўтган тантанали маросим билан ушбу лойиҳанинг илк босқичи — корпус остини қўйиш бошланди. Кемалар Малайзия билан имзоланган LMS (Littoral Mission Ship) Batch-2 дастури доирасида барпо этилмоқда.
Малайзия турк корветларининг Осиё-Тинч океани минтақасидаги илк мижози бўлди. Улар мамлакатга ўз манфаатларини ҳимоя қилиш, денгиздан келадиган хавфларга қарши туриш, ҳаво ҳужумидан мудофаа, электрон уруш ва асимметрик таҳдидларга қарши кураш имкониятларини беради. Кемалар 2027 йил охирига қадар етказиб берилиши режалаштирилган.
STM компанияси корветларнинг дизайни, қурилиши, барча тизимлар интеграцияси ва логистикасига жавобгар бўлиб, лойиҳага Туркиянинг бошқа ҳарбий саноат корхоналари ҳам жалб қилинган. Ҳар бир кема 99,5 метр узунликка эга бўлиб, 26 тугундан (48,15 км/соат) ортиқ тезликда ҳаракатлана олади. Қолаверса, улар 4 000 денгиз милидан (7408 километр) ортиқ масофани босиб ўтишга қодир. Корветларда 111 нафар экипаж бўлади, шунингдек, вертолётлар учун ангар ва ёнилғи қуйиш тизими ҳам кўзда тутилган.
Гап қуролланиш ҳақида кетса, кемаларда Италияда ишлаб чиқилган 76 мм калибрли Leonardo 76 мм асосий тўпи, маҳаллий Aselsan компаниясининг Smash 30 мм автоматик қуроли, Roketsan’нинг Atmacа (ер-ер) ракеталари ва Жанубий Кореяга тегишли Haegung (ер-ҳаво) тизимлари ўрнатилади. Шунингдек, уларни замонавий электрон уруш воситалари, радарлар ва Havelsan компаниясининг жанговар бошқарув тизими билан жиҳозлаш кўзда тутилган.
LMS Batch-2 дастури Туркия ва Малайзия ҳукуматлари ўртасида 2024 йил июнь ойида имзоланган ҳамкорлик битимидан сўнг бошланди. Кема корпуслари учун пўлат кесиш ишларига ўтган йилнинг декабрь ойида старт берилган.
Изоҳ (0)