Ҳиндистоннинг Мадҳя-Прадеш штатида номаълум йиртқич ҳайвон ҳужумлари оқибатида икки ҳафта ичида олти киши ҳалок бўлди. Бу ҳақда NDTV хабар берди.
Ҳужумлар 5 май куни соат тунги 1:00 да бошланган. Лимбой қишлоғининг 17 нафар фуқароси уйқуда ётган пайтда ҳужумга учраган. Йиртқич ҳайвон қишлоқдаги учта алоҳида жойга бир вақтнинг ўзида ҳужум қилган. Баъзи омон қолганлар ҳайвонни “итга ўхшаш” деб таърифлаган бўлса, бошқалар унинг ноодатий белгиларини — нотекис оёқлари ва қия белини — сиртлонга хос белгилар сифатида кўрсатган.
Овоз чиқармади: вовуллаш ҳам, ириллаш ҳам йўқ эди. Фақат сояси кўриниб, бир тишлаб ғойиб бўлди, дейди омон қолганлардан бири.
Барча жабрланувчилар қутуришга қарши вакцина билан эмланган. Бироқ 23 майдан 2 июнгача бўлган оралиқда 40–60 ёшдаги икки нафар аёл ва тўрт нафар эркак вафот этган. Охирги қурбон — 40 ёшли Сунил — туман шифохонасига олиб кетилаётганда йўлда жон берган.
Қурбонлардан бири, 50 ёшли Чаин Сингҳ Умрао, 1 июнь куни соғайиш белгилари кузатилганидан бир неча соат ўтиб тўсатдан вафот этган. Шифокорлар неврологик ҳолатнинг тез ёмонлашуви ва жароҳатларнинг ғайриоддий табиати устида бош қотирмоқда.
Жабрланган 11 нафар одамни текширган тиббиёт ходимлари ҳайвоннинг тиш излари одатда учрайдиган белгилар билан мутлақо мос келмаслигини билдирган. Кҳандва тиббиёт коллежи мутахассислари айни пайтда кенг қамровли тиббий текширув олиб бормоқда.
Биз барча жиҳатларни чуқур ўрганмоқдамиз, деди Барвани тумани ҳокими Гунча Санобар қишлоққа ташрифи чоғида.
Соғлиқни сақлаш идоралари таъкидлашича, беморларга вакциналар меъёрий сақлаш ва қўллаш қоидаларига мувофиқ берилган. Шунга қарамай, юзага келган ўлим ҳолатлари сабабли қутуришга қарши инексия намуналари Ҳимачал-Прадеш штатидаги Касаул шаҳрида жойлашган Миллий дори воситаларини назорат лабораториясига юборилган.
Бундан ташқари, қурбонларнинг ички аъзолари, мия тўқималари ва томоқ биопсиялари чуқур таҳлил учун Деҳлидаги вирусология лабораториясига олиб кетилган.
Ўлимга айнан қутуришми ёки бошқа омил сабаб бўлганини фақат шу лаборатория натижалари аниқлаб беради, деди Индордаги соғлиқни сақлаш бўйича юқори лавозимли мутахассис.
Ўрмон хўжалиги бўлими йиртқични қидириш ишларини давом эттирмоқда, бироқ ҳозиргача ҳеч қандай натижага эришилмаган.
Ҳеч қандай из, белги ёки ҳайвон кўриниши йўқ. Ўрмон қишлоқдан атиги 4,5 километр узоқликда жойлашган ва биз маҳаллий аҳоли берган маълумотлар асосида иш олиб боряпмиз. Одамларнинг айтишича, у итга ўхшарди, лекин бошқача ҳаракатланарди, деди бўлим вакили Aшиш Бансод.
Қишлоқ аҳолиси ўрмон қўриқчиси идораси олдида норозилик билдирган ва ҳукуматни ҳаракатсизликда айблаган.
Бундай ҳайвонни йўлда юриб топиб бўлмайди. Дронлардан фойдаланинг, қидирув гуруҳларини кўпайтиринг, деди қишлоқ аҳолиси вакили Ракеш Жамре.
Изоҳ (0)