Давлат бюджетига қайси солиқ тури энг кўп даромад келтираётгани очиқланди

2025 йил I ярмида давлат бюджети даромадлари 2024 йил мос даврига нисбатан 19,2 фоизга ошди. Бу ҳақда Иқтисодиёт ва молия вазирлиги маълум қилди.

Жорий йил январь—июнь ойларида Ўзбекистон давлат бюджети тушумлари 144,2 трлн сўмни ташкил этди. Таққослаш учун, 2024 йил мос даврида бу рақам 121 трлн сўм бўлган.

Вазирлик таҳлилига кўра, солиқлардан бошқа даромадлар тушуми ўтган йил I ярмидагидан 5,7 трлн сўмга кўпайиб, 29,3 трлн сўмга етган. Қолган 121,3 трлн сўмлик тушумлар солиқлардан таъминланган. Хусусан, бюджетга энг кўп солиқ тушуми қўшилган қиймат солиғидан келган — 35,9 трлн сўм. Мазкур солиқдан даромадлар 2024 йил мос давридагидан 9,2 трлн сўмга кўпайган.

Кейинги йирик тушум фойда солиғидан йиғилган — 22,5 трлн сўм. Жисмоний шахслардан олинган даромад солиғи эса 19,9 трлн сўмга етган (2024 йил мос даврида 16,9 трлн сўм).

Шу билан бирга, ер қаъридан фойдаланганлик учун солиқдан 10,3 трлн сўм, акциз солиғидан 10 трлн сўм йиғилган. Мамлакат аҳолиси ер солиғига 4,8 трлн сўм, мол-мулк солиғига 4,1 трлн сўм тўлаган.

Божхона божи тушумлари 5,4 трлн сўмга етган (2024 йил мос даврида 4,7 трлн сўм).

Аввалроқ Солиқ қўмитаси 2025 йил I ярмидаги солиқ тушумлари миқдори бўйича дастлабки ҳисоб-китобларини очиқлаганди. Унга кўра, олти ойда бюджетга 102,6 трлн сўм солиқ йиғилган. Мазкур кўрсаткич 2024 йил мос даврига (85,8 трлн сўм) нисбатан 20 фоизга ортгани қайд этилган. 

Жорий йил I ярмида даромад солиғи тўловчилар сони бир йил олдингидан 0,7 фоизга (6 млн 23 мингтадан 5 млн 980 мингта қолган) камайган. Шунингдек, айланмадан олинадиган солиқ тўловчилар 2024 йил I ярмидаги 344,2 тадан жорий йил июлигача 332 мингта қолган (пасайиш 35 фоиз).