Ҳиндистонда коронавируснинг Жанубий Африка ва Бразилияда пайдо бўлган штаммлари аниқланди. Эндиликда ушбу мамлакатлардан келган фуқаролар қатъий тестдан ўтади. Бу ҳақда Ҳиндистон Соғлиқни сақлаш вазирлиги маълумотига таяниб, «Korrespondent.net» хабар берди.
Вазирлик вакилларининг айтишича, коронавируснинг «африканча» штамми январь ойида тўрт кишида қайд этилган. Февраль ойида эса бир кишида «бразилияча» штамм аниқланган.
Ҳиндистон ҳукумати ҳозирда Буюк Британиядан келганлар сингари Бразилия ва Жанубий Африкадан ташриф буюрувчиларнинг барчаси учун мажбурий ПЗР тестларини жорий этиш масаласини кўриб чиқмоқда. Бугунги кунга қадар Ҳиндистонда «британча» штаммга чалиниш бўйича 187 та ҳолат қайд этилган.
«Жанубий Африка ёки Бразилиядан тўғридан-тўғри рейслар мавжуд эмас, шунинг учун Соғлиқни сақлаш вазирлиги ва Фуқаро авиацияси вазирлиги бу борада кўриладиган чораларни муҳокама қилмоқда», — деди соғлиқни сақлаш вазири Ражеш Бхушан.
Ҳиндистонда пандемия бошланганидан бери 10,93 миллион киши коронавирус билан касалланган. Мамлакат инфекцияга чалинганлар сонининг кўплиги бўйича АҚШдан кейин иккинчи ўринда туради.
2020 йилнинг декабрь ойида Ҳиндистон жанубидаги Элуру шаҳрида номаълум касаллик тарқалгани ҳақида хабар берилганди. Касалликдан жабрланганлар сони 800 кишидан ошган. Бир киши вафот этган. Беморлар бош айланиши, бош оғриғи, тутқаноқ тутишидан шикоят қилган. Кейинчалик бунга заҳарланиш сабаб бўлгани ва касалликнинг COVID-19’га алоқаси йўқлиги аниқланган.
Эслатиб ўтамиз, 3 январь куни Ҳиндистон коронавирусга қарши AstraZeneca вакцинасидан фойдаланишни маъқуллаган. Шунингдек, Ҳиндистон тиббиёт дори воситалари стандартини назорат қилиш ташкилоти маҳаллий Bharat Biotech вакцинасини ҳам маъқуллашини тасдиқлаган эди.
Изоҳ (0)