Ҳиндистон аэропортига йўловчи 47 та заҳарли илон олиб келди (фото)

Ҳиндистон аэропортида 47 та заҳарли илонни мамлакатга олиб киришга уринган эркак ушланди. Бу ҳақда BBC хабар берди.

Ҳодиса 1 июнь куни Мумбай аэропортида содир бўлган. Эркак судралиб юрувчиларни Таиланддан олиб келган. Йўловчининг багажи текширилганида 47 та заҳарли илон ва 5 та тошбақа аниқланган. Илонлар Ҳиндистонда ёввойи табиатни муҳофаза қилиш тўғрисидаги қонунларга мувофиқ олиб қўйилган. Йўловчининг исми ошкор этилмаган ва у ҳибсда сақланмоқда.

Божхона ходимлари судралиб юрувчиларнинг фотосуратларини эълон қилган. Уларнинг сўзларига кўра, йўловчидан учта ўргимчаксимон илон, бешта Осиё тошбақаси ва 44 та Индонезия илонлари мусодара қилинган. Эркак бу судралиб юрувчиларни қаердан олгани номаълум.

Ҳиндистоннинг ёввойи табиатни муҳофаза қилиш тўғрисидаги қонуни йўқолиб кетиш хавфи остида бўлган ёки давлат томонидан муҳофаза қилинадиган турларни импорт қилишни тақиқлайди. Йўловчи ҳар қандай ёввойи ҳайвонларни олиб киришдан олдин тегишли рухсатнома ва лицензияларни олиши керак.

Январь ойида Ҳиндистон ҳукумати Деҳли аэропортида бир канадаликни юкида тимсоҳ бош суягини олиб кетаётгани учун ҳибсга олганди. Бир ой ўтгач эса, Мумбай аэропорти ходимлари Индонезия, Малайзия ва Таиланд ўрмонларида яшовчи бешта кичик сиаманг гиббонларини олиб кетаётган йўловчини тўхтатган.