Ҳиндистондаги номаълум касалликка металлардан заҳарланиш сабаб бўлганлиги тахмин қилинмоқда

Ҳиндистон жанубидаги Андхра-Прадеш штатида аниқланган номаълум касалликка қўрғошин ва никелдан заҳарланиш сабаб бўлган бўлиши мумкин, уларнинг қолдиқлари сув ва сутдан топилган. Бу ҳақда «РИА Новости» штат бош вазири матбуот хизматига таяниб хабар бермоқда.

Элуру шаҳрида ва унинг атрофларида номаълум касаллик ўтган якшанба куни авж ола бошлади. Касаллик белгилари орасида уч-беш дақиқа мобайнида тутқаноқ тутиб қолиш, бир неча дақиқага хотирани йўқотиш, тўсатдан ҳушини йўқотиш, бош оғриғи ва бел оғриғи бор. Жами 505 киши касалликка чалинган, 370 дан ортиқ одам соғайган, яна 120 нафари касалхоналарда қолмоқда.

«Сирли касалликни нима келтириб чиқаргани ҳақидаги тўлиқ маълумот марказий идоралар ўз ҳисоботларини тақдим этгандан кейин аниқ бўлади. Биринчи навбатда аниқланган нарса шу бўлдики, касаллик авж олишига қўрғошин сабаб бўлган», — деди штат раҳбарининг соғлиқни сақлаш бўйича ўринбосари Алла Кали Кришна Шринивас.

Ҳисоботда таъкидланишича, бу дастлабки маълумотлар, ҳали қўшимча тадқиқотлар натижаларини ҳам кутиш керак.

The Times of India аниқлик киритишича, тадқиқотни Ҳиндистон кимёвий технологиялар институти ва бошқа институтлар мутахассислари олиб бормоқда, унинг натижалари яқин орада эълон қилиниши кутилмоқда. Нашр маълумотларига қараганда, баъзи беморлар сувнинг ранги ва мазаси ўзгаргани сезилганини айтган.

Маҳаллий ОАВлар ёзишича, Элуру шаҳри жойлашган Ғарбий Годавари округида ичимлик суви билан боғлиқ муаммолар мавжуд. Округ Андхра-Прадеш штатидаги энг йирик гуруч экспортчиси ҳисобланади, унинг суғориш тизимига эса британиялик афсонавий муҳандис сэр Артур Коттон бир аср аввал асос солган.

Эслатиб ўтамиз, Ҳиндистон жанубидаги Элуру шаҳрида 5 декабрдан буён бир киши номаълум касалликдан вафот этган, яна 848 кишида шу касаллик белгилари аниқланган. Беморлар бош айланиши, бош оғриғи, тутқаноқ тутишидан шикоят қилмоқда. Ҳукумат қайд этишича, касаллик одамдан одамга юқмайди. Times of India маълумотларига кўра, заҳарли хлорорганик бирикмалар ва чивинга қарши воситалар ҳам сабабчи бўлган бўлиши мумкин. Дастлабки маълумотларга кўра, бунга заҳарланиш сабаб бўлган, у COVID-19’га алоқадор эмас.