АҚШ ҳукумати барча дори-дармонларга чидамли ва ўлимга олиб келувчи замбуруғ инфекцияси билан касалланиш авж олганини қайд этди. Бу ҳақда АҚШ касалликларни назорат қилиш ва олдини олиш маркази (CDC)га таяниб, «РБК» хабар берди.
Candida auris деб аталувчи ушбу инфекция турини даволаш қийин ва у одатда ўлим билан якунланади. Касаллик Америкадаги қариялар уйлари ва шифохоналарда тарқалмоқда.
Ушбу касаллик иммунитети заиф беморларга таъсир қилади. Дастлаб у 2009 йилда Японияда аниқланган. 2021 йил январидан апрелгача 120 дан ортиқ кишида мазкур замбуруғ инфекцияси қайд этилган. Бироқ Candida auris касаллигига чалиниш бўйича беш ҳолатда мутахассислар илк бор замбуруғнинг муолажаларга чидамли вариантига дуч келди, дейилади CDC хабарида. Техас (учта ҳолат) ва Вашингтондаги (иккита ҳолат) соғлиқни сақлаш муассасаларида шундай хусусиятга эга инфекция аниқланди.
CDC маълумотларига кўра, Candida auris билан касалланган беморларнинг қарийб учдан бир қисми 30 кун ичида вафот этган. Бироқ марҳумлар шундоқ ҳам оғир касал бўлган ва уларнинг ўлимига замбуруғ сабаб бўлганми ёки йўқ, номаълум дейди мутахассислар.
Сўнгги саккиз йил ичида АҚШда 2000 дан ортиқ одам Candida auris касаллигини юқтирган, уларнинг аксарияти Нью-Йорк, Нью-Жерси, Иллинойс ва Калифорнияга тўғри келади. Қўзғатувчининг таъсирига учраган 5-10 фоизи кишиларнинг қон томирларида янада жиддий инфекциялар ривожланади.
Июнь охирида Ҳиндистонда замбуруғ касаллигининг кенг тарқалган тури мукормикоз («қора замбуруғ») билан касалланиш бўйича 40 845 та ҳолат аниқланганди, ушбу инфекция туфайли 3129 киши вафот этган.
Май ойида Ҳиндистоннинг Ражастан ва Телангана штатлари мукормикоз эпидемиясини эълон қилди — замбуруғ касаллиги биринчи навбатда коронавирус билан оғриганларда қайд этилганди.
Май охирида Ҳиндистон шифокорлари коронавирусга чалинган беморда замбуруғ инфекциясининг учинчи тури — «сариқ замбуруғ»ни аниқлади. Мамлакатда «сариқ замбуруғ» билан касалланган биринчи бемор вафот этди.
Июнь ўртасида эса Ҳиндистонда COVID-19’га чалинган беморда «яшил замбуруғ» аниқланди.
Изоҳ (0)