Исроилнинг хавфсизлик соҳасида фаолият юритган 600 га яқин собиқ амалдори, жумладан Моссад ва Шин Бет ташкилотлари, армия ҳамда дипломатик корпуснинг собиқ раҳбарлари АҚШ президенти Дональд Трампга мурожаат қилиб, Ғазодаги урушни тўхтатиш учун Исроил ҳукуматига босим ўтказишни сўради. Бу ҳақда BBC хабар берди.
Ушбу мурожаат Ғазода уруш тўхтамаётгани, сулҳ бўйича билвосита музокаралар тўхтаб қолгани ва Исроил бош вазири Биньямин Нетаньяху ҳарбий ҳаракатларни кенгайтиришга уринаётгани фонида эълон қилинди.
“Муҳим стратегик мақсадлар аллақачон амалга оширилди, ҲАМАС эндиликда Исроил учун стратегик таҳдид эмас. Исроилликларнинг катта қисмида сизга нисбатан ишонч мавжуд, бу эса Нетаньяхуни урушни тугатишга ундашингизда муҳим омил бўлиши мумкин. Ғазодаги урушни тўхтатинг. Олдин бундай иш Ливанда ҳам қилинганди. Энди навбат Ғазога”, дейилади мурожаатда.
Мурожаатчилар орасида собиқ амалдорлар, жумладан бош вазир Эҳуд Барак, мудофаа вазири Моше Яъалон, Моссад ташкилоти раҳбари Тамир Пардо ва Шин Бет раҳбари Ами Аялон бор. Хусусан, Аялон мурожаатда шундай деган:
“Бу аввал адолатли уруш эди. Барча ҳарбий мақсадлар амалга оширилгач, уруш ўз маъносини йўқотди”.
Собиқ расмийларнинг Трампга мурожаати гаровдаги икки исроиллик ҳарбийнинг ҳолсиз ва озиб кетган ҳолдаги видеоси эълон қилинганидан сўнг юзага келган. Бу тасвирлар Исроил ва Ғарб етакчилари томонидан кескин танқид қилинмоқда. Бироқ Нетаньяху гаровдагиларни “ҲАМАСнинг ҳарбий йўл билан тор-мор этилиши” орқали озод қилиш ниятида эканини билдирган.
Моссад (המוסד) – 1949 йилда асос солинган Исроил ташқи разведка хизмати. Унинг вазифаси қуйидагилардан иборат бўлган: Исроилдан ташқарида разведка ишлари олиб бориш; терроризмга қарши кураш; душман давлатларда махфий операциялар ўтказиш; қочқин яҳудийларни олиб келиш ва ядро қуроллари ҳамда ҳарбий таҳдидларни кузатиш.
Маълумот учун, Ғазо секторидаги уруш 2023 йил 7 октябрь куни ҲАМАСнинг Исроил жанубига ҳужуми ортидан бошланган. Яҳудий расмийларига кўра, ҳодиса оқибатида Исроил томонидан 1 200 киши ҳалок бўлган, 251 киши гаровга олинган. ҲАМАС бошқарувидаги Ғазо соғлиқни сақлаш вазирлиги уруш бошланганидан буён бугунгача анклавда 60 мингдан ортиқ одам ҳалок бўлганини маълум қилган. Ҳозирда, қамал оқибатида ҳудудда очарчилик авж олмоқда. Расмийларга кўра, 180 киши, жумладан 93 нафар бола, етарли озиқ-овқат йўқлигидан юзага келган очарчилик сабаб вафот этган.
Изоҳ (0)