Эрон Қрим ва Украинанинг тўрт шарқий ҳудуди Россия томонидан аннексия қилинишини тан олмайди. Бу ҳақда Эрон ташқи ишлар вазири Ҳусайн Амир Абдуллоҳиённинг TRT World’га берган интервьюсига таяниб, «РБК» хабар берди.
Абдуллоҳиённинг таъкидлашича, Москва билан «аъло» муносабатларга қарамай, Эрон Қрим яриморолининг аннексия қилинишини ва босиб олинган тўртта ҳудуднинг Россияга таркибига киритилишини тан олмайди. Эронлик дипломат Теҳрон халқаро қонунлар доирасида давлатларнинг ҳудудий яхлитлигини тан олиши ва шу сабабли Украина ҳудудлари Россия томонидан аннексия қилинишини тан олмаслигини билдирди.
«Биз халқаро қонунлар доирасида давлатлар суверенитети ва ҳудудий яхлитлигини тан оламиз, шунинг учун Теҳрон ва Москва ўртасидаги аъло даражадаги муносабатларга қарамай, Қрим, Луганск ва Донецк вилоятларининг Украинадан ажратилишини тан олмадик», — дейди Абдуллоҳиён.
Шу билан бирга, ТИВ раҳбари Эрон Россия-Украина урушига қарши эканини таъкидлаб, можаро тезроқ якунланишига умид билдирган. «Биз Украинадаги можаро ечим эмас деб, ташқи сиёсатдаги изчил тамойилимизни яна бир бор таъкидлаймиз», — деган дипломат.
Унинг сўзларига кўра, Эрон ўз позициясига содиқ ва асосий ташқи сиёсат тамойили сифатида унга таянади.
Бир кун аввал, 18 январь куни Москванинг яна бир анъанавий «иттифоқчиси» Сербия президенти Александр Вучич ҳам худди шундай баёнот билан чиққанди.
«Биз бошиданоқ Россиянинг Украинага бостириб киришини қўллаб-қувватлашга ҳаққимиз йўқлигини айтдик. Биз учун Қрим ва Донбасс — Украина ва у доимо шундай бўлиб қолади», — деган эди у.
Маълумотларга кўра, Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.
Ноябрь ойи бошида Эрон ташқи ишлар вазири Ҳусайн Абдуллоҳиён Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
13 декабрь куни Эрон мудофаа вазири Муҳаммад-Ризо Аштианий Киев уруш пайтида Эрон қуролларидан фойдаланилаётгани ҳақида бирорта далил келтирмаганини даъво қилди. Вазирнинг айтишича, Украина ва Эрон ҳарбийлари ўртасида учрашув бўлиб ўтган, унда Украина томони Эроннинг Россияга дронлар етказиб бераётгани, улардан Украина шаҳарларига ҳужумда фойдаланилаётганини тасдиқловчи ҳеч қандай ҳужжат тақдим этмаган.
Изоҳ (0)