Россия Хитой билан Керч бўғози орқали Қримгача бўлган сувости туннелини қуриш бўйича музокаралар олиб бормоқда. Бу ҳақда Тhe Washington Post нашри хабар берди.
Маълум қилинишича, октябрь ойи охирида россиялик ва хитойлик ишбилармонлар ўртасида яширин музокаралар олиб борилган.
“Октябрь ойи охиридаги учрашувларни ўз ичига олган музокараларга Россия ҳарбийлари учун асосий логистика линияси бўлиб хизмат қилган, лекин Украина томонидан икки марта бомбардимон қилинган 11 милялик Керч бўғози кўприги хавфсизлиги бўйича Россиянинг ортиб бораётган хавотирлари сабаб бўлган”, — дейилади хабарда.
Музокаралар Россиянинг 2014 йилда ноқонуний равишда қўшиб олган Қрим устидан назоратини сақлаб қолиш қатъиятини, шунингдек, Москванинг глобал кўмак учун Хитойга қарамлиги кучайиб бораётганини кўрсатади.
АҚШ расмийлари ва муҳандисларининг фикрича, бундай ғояни амалга ошириш қийин бўлади. Йиллар давом этадиган қурилиш учун камида 5 миллиард доллар сарфлаш керак бўлади. Бундан ташқари, бундай иш ҳеч қачон жанговар зонада амалга оширилмаган.
Таъкидланишича, Керч туннели ўз вақтида қуриб битказилиши Россиянинг уруш ҳаракатларида ёрдам бериши даргумон. Аммо Кремль буни узоқ муддатли сармоя сифатида кўриши мумкин — у ўнлаб йиллар давомида рақобатлаша оладиган ҳудуд билан хавфсиз уланишни таъминлашга қаратилган.
Бундан ташқари, ушбу лойиҳа Қримнинг Россия томонидан аннексия қилинишини ҳеч қачон расман тан олмаган ва компаниялари АҚШ, Евроиттифоқ томонидан қўллаган иқтисодий санкциялар тузоғига тушиб қолиши мумкин бўлган Хитой учун сиёсий ва молиявий хавф туғдириши кўрсатилган.
Аммо манбаларда Хитойнинг энг йирик қурилиш компанияларидан бири лойиҳада иштирок этишга тайёрлигини айтилган. Хитойнинг CРCC темир йўл қурилиш корпорацияси Қримда ҳар қандай мураккабликдаги темир йўл ва автомобиль йўллари қурилишини таъминлашга тайёрлигини айтгани таъкидланган. Илгари ушбу корпорация Россия билан бир неча бор ҳамкорлик қилган, хусусан, Москвада метро линияларини кенгайтиришга ёрдам берган.
Изоҳ (0)