Россия Азов денгизи ва Қрим устида 40 дан ортиқ Украина дрони уриб туширилганини маълум қилди

Россия Мудофаа вазирлигининг маълум қилишича, 5 декабрга ўтар кечаси Азов денгизи ва Қримда ўнлаб Украина дронлари “йўқ қилинди”.

Дастлаб вазирлик матбуот хизмати Россия ҳаво ҳужумидан мудофаа кучлари Азов денгизи ва Қрим ҳудудида 22 та дронни уриб туширганини айтди. Мудофаа вазирлиги маълумотларига кўра, яна 13 та учувчисиз учар аппарат тутиб олинган.

Кўп ўтмай, ҳарбийлар Азов денгизи устида яна тўртта дрон уриб туширилгани ва иккитаси тутиб олингани ҳақида хабар берди. Мудофаа вазирлиги тунги ҳужум оқибатларини очиқламади.

Шу билан бирга, аннексия қилинган Қрим аҳолиси Керчь, Феодосия ва Эски Қрим ҳудудларида қатор портлашлар содир бўлганини маълум қилди.

Қрим кўпригида транспорт ҳаракати тўрт соатдан кўпроқ вақтга тўхтатилди, тонгда қайта тикланди.

Маҳаллий ҳукумат ҳозирча воқеа юзасидан изоҳ бермаган.

Украина ҳарбийлари аннексия қилинган Қрим ҳудудига мунтазам зарбалар бериб келмоқда. Хусусан, ноябрь ойи бошида Керчдаги Бутома номидаги “Залив” кемасозлик заводига ракета урилган, бунинг оқибатида Россия ҳарбий-денгиз кучларининг кемаларидан бири шикастланган.