Украина ракеталари Қримдаги Россия ҳарбий самолётларини йўқ қилган. Бу ҳақда The Moscow Times нашри хабар берди.
Манбада айтилишича, жума куни сунъий йўлдошдан олинган тасвирлар Украина ракеталари Қримдаги нишонга муваффақиятли урилганини тасдиқлаган. Қримда Россиянинг камида учта ҳарбий самолёти йўқ қилингани маълум қилинган.
Олдинроқ Россия Мудофаа вазирлиги 15—16 май кунлари АҚШ томонидан етказиб берилган 15 та ATACMS ракеталари руслар томонидан тутиб олинганини билдирган эди. Ракеталар ҳеч қандай тузилмага зарар етказмагани билдирилган. Қримдаги Севастопол шаҳри губернатори Михаил Развожаев ҳам 15 май куни Россия ҳаво мудофаа тизимлари Белбек аэродроми устида Украина ракеталарини уриб туширганини хабар қилган.
АҚШнинг Maxar тижорат сунъий йўлдош компаниясидан олинган суратларда Белбек аэродромида йўқ қилинган иккита МиГ-31 қирувчи самолёти ва битта Су-27 қирувчи самолёти кўрсатилган, Reuters агентлиги билдиришича, битта МиГ-29 қирувчи самолёти ҳам шикастланган.
Севастопол ва Қрим ҳудудига сўнгги ҳаво ҳужумлари кўпайгани хабар берилган. Россия маъмурияти яриморолга учувчисиз учоқлар ва ракета ҳужумлари сони ортганини қайд этган.
Изоҳ (0)