“Қрим ва Донбасс Россия таркибида абадий қолади” — Словакия бош вазири

Словакия бош вазири Роберт Фико Донбасс ва Қрим абадий Россия таркибида қолишини маълум қилди. Бу ҳақда “ТАСС” нашри хабар берди.

Манбада айтилишича, 17 апрель куни Словакия бош вазири Роберт Фико мамлакат Миллий кенгаши (парламенти)нинг Европа ишлари бўйича қўмитаси аъзолари олдида нутқ сўзлаган. Нутқида у Россия ва Украина уруши якуни борасида бир қанча фикрларини билдирган.

“Халқаро ҳуқуқ нуқтаи назаридан, ҳар биримиз бошқа давлатнинг ҳудудий яхлитлиги, унинг суверенитети ва чегаралари дахлсизлигини тан оламиз. Бу ажойиб халқаро ҳуқуқ амалиётидир. Лекин, шуни айтишим керакки, руслар Қримни ҳеч қачон қайтариб беришмайди. Улар Донбассдан ҳам, Луганскдан ҳам чиқиб кетмайдилар”, — деган бош вазир.

Словакия вазирига кўра, Киев билан қарама-қаршиликда Москва ғалаба қозонади. Айни дамда тинчликка эришиш учун ҳар икки томон бир-бирига ён беришга мажбур.

Словакия бош вазири Роберт Фико узоқ вақтдан бери Ғарбнинг Украина бўйича стратегиясини танқид қилиб, можаронинг ҳарбий ечими йўқлигини таъкидлаб келаётган эди.