Coca-Cola компанияси Россия Федерациясини босиб олинган Қрим билан тасвирлаган харита учун расман узр сўради. Бу ҳақда Украинанинг АҚШдаги элчихонаси маълумотига таяниб, «Корреспондент.net» хабар беради.
«6 январь куни Украинанинг АҚШдаги элчихонасида Coca-Cola’нинг Вашингтондаги офиси раҳбари К.Ирвин билан учрашув бўлиб ўтди. Учрашув давомида у компаниянинг Россиядаги вакиллиги томонидан Россия ноқонуний босиб олган Қрим билан акс эттирилган харита билан боғлиқ англашилмовчилик юзасидан расман узр сўради», — дейилади хабарда.
Шунингдек, Ирвин Coca-Cola компаниясининг катта вице-президенти Клайд Таггл томонидан Украинанинг АҚШдаги элчиси Валерий Чалий номига йўлланган хатни тақдим этди. Унда компаниянинг розилигисиз ва уни хабардор этмасдан мустақил агентлик томонидан чоп этилган мазкур харита учун узр сўралган.
Эслатиб ўтамиз, дастлаб Coca-Cola ижтимоий тармоқларида Россия харитаси Қрим, Калининград вилояти ва Курил оролларисиз бўлган. Бу харита чоп этилгани учун компания кечирим сўраган ва шундан сўнг таркибига Қрим қўшилган Россия харитасини эълон қилган. Бу эса яриморолни босиб олинган деб ҳисоблайдиган украиналиклар норозилигига сабаб бўлган. Охир-оқибат Coca-Cola ижтимоий тармоқлардан харитани ўчириб ташлаган эди.
Изоҳ (0)