Ўзбекистон ташқи ишлар вазири биринчи ўринбосари Илҳом Неъматов Россиянинг «РИА Новости» агентлигига берган интервьюсида Евросиё иқтисодий иттифоқи (ЕОИИ)га қўшилиш мамлакат учун иқтисодий жиҳатдан фойдали эканини таъкидлади.
У ёки бу мамлакатнинг у ёки бу ташкилот таркибига кириши, унинг фаолиятида қатнашиши аввало шу мамлакатнинг ўзи учун фойдали, манфаатли бўлиши керак. Ахир у аъзо бўляпти. Шу боис ҳозирда ушбу масала ўрганилмоқда, атрофлича ўрганилмоқда. Ўрганиш натижалари тарозига қўйилиб, кейин, табиийки, қарор қабул қилинади.Россия ахборот агентлиги мухбирининг: «Якуний қарор қачон қабул қилинишига умид қилса бўлади?» деган мазмундаги саволига жавоб бераркан, ТИВ вакили ҳозирда жараён тезлашганини маълум қилган.Ўзбекистоннинг ушбу ташкилот (ЕОИИ) билан яқин муносабатда бўлишини қувватлантирадиган омиллар бор. Биз жуғрофий жиҳатдан марказда жойлашганмиз. Ҳеч бир масалани Ўзбекистоннинг ёки Марказий Осиёнинг бирор бир мамлакати иштирокисиз ҳал қилиш мумкин эмас. Россия — ушбу ташкилот аъзоси, бизнинг стратегик шеригимиз, иттифоқчимиз. Қозоғистон ҳам — стратегик ҳамкор. Географиянинг ўзи бизни ушбу ташкилот билан яқин бўлишга ундамоқда. Мен ЕОИИни назарда тутяпман.
Ҳозир Ўзбекистоннинг иқтисодиёти, саноати, қишлоқ хўжалиги ўсмоқда. Экспорт ошмоқда. Бизга бозор, макон керак. Бу макон қаерда? Бу макон Евросиё иқтисодий иттифоқи ҳисобланган Қозоғистонда, Россияда, Қирғизистонда, шу боис мен очиқ айтаман — мен бу ташкилот фаолиятида қатнашиш тарафдориман. Фақат иқтисодий манфаатлардан келиб чиқиб.
Яна бир аҳамиятга эга омил — бу демография. Ўзбекистонда аҳоли сони ошмоқда, ҳар йили 700 минг кишига кўпаймоқда. Табиийки, биз 700 минг кишини муносиб иш жойи билан таъминлай олмаймиз. Бу нимага олиб келади? Миграцияга. Халқимиз қаерга кўчяпти? Россияга, Қозоғистонга. Бу омил ҳам Ўзбекистонни ЕОИИ билан яқин алоқаларни қўллаб-қувватлашига ундамоқда. Бу ташкилотда аъзо мамлакатлардан келган мигрантлар учун шароитлар бошқа, қарор қабул қилишда шу шарт-шароитларни ҳам ҳисобга олиш керак.
Яна, бу ҳам катта аҳамиятга эга омил, Россия билан маҳсулот айирбошлаш ҳажмимиз етти миллиард долларга тенг, олдимизга уни 10 миллиард долларга олиб чиқиш вазифаси қўйилган. Қозоғистон билан ҳозир уч миллиард, уни беш миллиард долларга олиб чиқиш керак.
Агар Ўзбекистон ЕОИИга аъзо бўлса, бу кимгадир ёқмаслиги мумкин. Лекин биз нега кимгадир ёқиш-ёқмаслигига қараб ўтиришимиз керак. Биз ўз миллий манфаатларимиздан келиб чиқиб ҳаракат қилишимиз керак. Агар бу бизнинг миллий манфаатларимизга мос келса, демак, ташкилотга кириш керак, у билан ҳамкорлик қилиш керак. Биз кузатяпмиз, кўряпмиз — ЕОИИнинг нуфузи ошиб бормоқда. Кўплаб мамлакатлар билан эркин савдо тўғрисида битимлар имзоланди. Хитой билан, Ҳиндистон билан, Сербия, Миср ва ҳатто Вьетнам билан ҳам. Жиддий миқёс бу. Бизга нима керак? Бизга иқтисодиёт керак. Мен бу ерда ҳеч қандай сиёсат йўқ, деб ҳисоблайман, биз бу ташкилот билан ҳамкорлик қилишдан иқтисодий манфаатдормиз.
Илҳом Неъматов, Ўзбекистон ташқи ишлар вазири биринчи ўринбосари
«Ҳозирга келиб, билишимча, жараён тезлашган. Яқинда, декабрь бошида Силуанов (Россия саноат вазири)нинг жамоаси шу ерда, Самарқандда бўлганди. Демак, музокаралар давом этмоқда. Эҳтимол, тез орада якунлашар. Ўйлашимча, яқин вақт ичида якунлашади», — деган Илҳом Неъматов.
Изоҳ (0)