Ўзбекистоннинг Россиядаги элчихонаси кўмагида бир гуруҳ ўзбекистонликлар «Саховат» ёрдам марказини ташкил этди.
Уларнинг асосий вазифаси COVID-19 пандемияси сабабли Россияда оғир ҳаёт шароитларига тушиб қолган ўзбекистонликлар ва уларнинг оила аъзоларига ёрдам кўрсатиш бўйича тизимли ишларни ташкил этишдир.
«Саховат» ёрдам маркази 16 апрелдан бошлаб «саховат.рф» портали орқали ва марказнинг Facebook саҳифасида ёрдам сўровномаларини қабул қилишни бошлайди.
Шундан сўнг марказ ходимлари Москва ва Москва вилоятида яшовчи муҳтож ўзбекистонлик фуқароларга озиқ-овқат маҳсулотлари ва дори-дармонларни манзилларига етказиб беришни режалаштирмоқда. Ёрдам, биринчи навбатда, аёлларга, қарияларга, ногиронлар ва ёш болаларга кўрсатилади.
Шунингдек, марказ +79167977772 ишонч телефони орқали ўзбекистонликларга бепул ахборот-ҳуқуқий ёрдам кўрсатади.
Ушбу марказга ҳисса қўшмоқчи бўлганлар Россиядаги ўзбекистонликларга банк пул ўтказмалари орқали ёрдам бериши ёки «Саховат» ёрдам марказининг волонтёри бўлиши мумкин.
Эслатиб ўтамиз, айни пайтда икки давлат ўртасидаги чартер рейслар тўхтатилган. Ўзбекистоннинг Россиядаги элчиси Ботиржон Асадов Россия ҳукумати томонидан тавсия этилаётган вирусга қарши курашиш чора-тадбирларига амал қилишга чақирганди.
Молиявий муаммоларни меҳнат мигрантларининг аҳволига аллақачон таъсирини ўтказган рубл курси ҳам янада чуқурлаштириши мумкин.
Аввалроқ коронавирус пандемияси туфайли Туркиянинг Истанбул шаҳрида оғир вазиятга тушиб қолган ўзбекистонликларга ёрдам акцияси уюштирилгани хабар берилган эди.
Изоҳ (0)