Ўзбекистонда бир йил ичида жисмоний шахслардан олинадиган даромад солиғи тўловчилар 400 минг кишига кўпайган. Бу ҳақда бош вазир ўринбосари, иқтисодиёт ва молия вазири Жамшид Қўчқоров жорий йил 3 июнда парламентдаги чиқишида маълум қилди.
Жамшид Қўчқоровнинг айтишича, нолегал иш ўринларини расмийлаштириш самарасини бермоқда.
“Ўтган йилда норасмий иш ўринларини легаллаштириш бўйича чоралар кўрилиши ва иқтисодий фаоллик ошиши натижасида жисмоний шахслардан олинадиган даромад солиғи тўловчилари сони 2023 йилга нисбатан 400 мингга кўпайди ва 6,3 миллионга етди”, деди ҳукумат расмийси.
Солиқ қўмитаси раиси ўринбосари Мубин Мирзаев бир неча йил олдин “Дарё”га берган интервьюсида норасмий бандликни қисқартириш бўйича режаларни айтганди. Ўшанда Ўзбекистонда 14 млн нафардан ортиқ меҳнатга лаёқатли фуқаро борлиги, шундан иш ҳақи ва даромад оладиганлари 7 млн кишилиги очиқланган. Мигрантлар сони эса 3 млн нафардан юқорилиги маълум қилинган.
“Биз қолган 4 миллион киши фаолиятини легаллаштиришимиз керак”, деган Мубин Мирзаев.
Солиқ қўмитаси маълумотларига кўра, ўтган йили жисмоний шахслардан олинадиган 12 фоизли даромад солиғидан бюджетга 35,4 трлн сўм тушган. Бу йиллик солиқ тушумларининг (199 трлн сўм) 18,3 фоизига тенг.
Изоҳ (0)