20 сентябрь куни кечки соат 22:00 да ўзбек муҳожирлари ўтирган квартирага маҳаллий полиция бостириб кирган.
Улар бу хонадонда 10 килограмм наркотик модда борлигини иддао қилиб, муҳожирларни калтаклай бошлаган. Муҳожирлардан икки нафари 2-қаватдан сакраб, қочмоқчи бўлган ва оғир жароҳатлар билан реанимацияга ётқизилган.
Иккинчи қаватдан қулаган икки ўзбекистонлик беҳуш ҳолатда пастда ётган ва уларни ўтиб кетаётган тожикистонлик бошқа мигрантлар кўриб қолиб, «Тез ёрдам» чақирган.
«Тез ёрдам» келиши биланоқ мигрантнинг квартирасида бўлган уч полициячи подезд ичкарисида кутиб турган бошқа шериклари билан ҳодиса жойидан қочиб кетган.
ТИВ матбуот хизматининг хабар беришича, 25 сентябрь куни Ўзбекистоннинг Россиядаги элчихонаси консуллик бўлими ходимлари Ўзбекистон фуқаролари И.Х. ва Д.Б.нинг ҳолидан хабар олди.
Жабрланганларнинг сўзларига кўра, улар федерал аҳамиятга эга объектларда реставрация ишларини олиб бориш учун малакали мутахассис сифатида Россияга таклиф қилинган.
Элчихона вазиятни назоратга олди ва Россия Ташқи ишлар вазирлиги, Бош прокуратураси, Тергов қўмитасига расмий мурожаат қилди ҳамда Ўзбекистон Бандлик ва меҳнат муносабатлари вазирлигининг Ташқи меҳнат миграцияси агентлиги ваколатхонаси билан биргаликда фуқароларни даволатиш учун тўловни амалга ошириш масаласини ҳал қилмоқда.
«Консуллик-ҳуқуқий департаменти эслатиб ўтадики, Россиянинг Марказий федерал округи (Белгород вилояти, Брянск вилояти, Владимир вилояти, Воронеж вилояти, Иваново вилояти, Калуга вилояти, Кастрома вилояти, Курск вилояти, Липецк вилояти, Москва шаҳри, Москва вилояти, Орлов/Орёл вилояти, Рязань вилояти, Смоленск вилояти, Тамбов вилояти, Тверь вилояти, Тула вилояти, Ярослав вилояти) ва Арманистон ҳудудидаги фуқароларимиз зарур вазиятларда Москва шаҳридаги Элчихонага қуйидаги телефон рақамлари орқали мурожаат қилишлари мумкин: : +7 499 230-00-76, +7 499 238-36-20», — дейилади хабарда.
Изоҳ (0)