Санитария-эпидемиологик осойишталик ва жамоат саломатлиги қўмитаси янги хавфли вирус тарқалгани ҳақидаги хабарларни рад этди.
Ижтимоий тармоқларда Хитойда HKU5-CoV-2 номли янги вирус аниқлангани тўғрисидаги хабарлар тарқалганди. Бу вирус COVID-19 дан ҳам хавфлироқ экани, янги пандемияга сабаб бўлиши мумкинлиги айтилганди.
“Ушбу хабарлар Хитой сариқ матбуотида чоп этилгани, лекин касаллик тўғрисида Хитой ҳамда ЖССТ расман эълон қилмаганини маълум қиламиз”, дейилади қўмита хабарида.
Санепидқўм Ўзбекистонда эпидемиологик вазият барқарорлигини алоҳида қайд этди ва ижтимоий тармоқ фаолларини тасдиқланмаган ёлғон ахборот тарқатганлик учун жавобгарлик белгилангани тўғрисида огоҳлантирди.
Май ойининг охирларида коронавируснинг янги тўлқини дунёни қамраб олмоқда, деган мазмундаги хабарлар тарқалганди. Санитария-эпидемиологик осойишталик ва жамоат саломатлиги қўмитаси раиси биринчи ўринбосари Нурмат Отабеков шу йил март ойида коронавируснинг Хитойда аниқланган NB.1.81 штамми баъзи мамлакатлар бўйлаб тарқалаётгани ҳақида маълумотлар борлиги, лекин COVID-19 нинг янги тўлқини дунёни қамраб олмоқда, деган хабарлар асоссизлигини билдирганди.
2025 йил бошларида эса Ўзбекистонда ўткир респиратор вирусли инфекциялар авж олгани ҳақида хабарлар тарқалганди. Нурмат Отабеков хавотирланишга асос йўқлигини, мамлакатда мавсумий респиратор касалликлар тарқалиши билан боғлиқ вазият барқарорлигини маълум қилганди.
Изоҳ (0)