Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков Ўзбекистонда коронавирус билан боғлиқ эпидемиологик вазият барқарорлигини маълум қилди.
Сўнгги пайтларда баъзи интернет нашрлари ва ижтимоий тармоқларда коронавируснинг янги тўлқини дунёни қамраб олмоқда, деган мазмундаги хабарлар тарқалганди. Хусусан, ўсиш суръатлари НБ.1.81 штамми билан боғлиқлиги айтилган.
“Шу йил март ойида коронавируснинг Хитойда аниқланган НБ.1.81 штамми баъзи мамлакатлар бўйлаб тарқалаётгани ҳақида маълумотлар бор, лекин COVID-19 нинг янги тўлқини дунёни қамраб олмоқда, деган хабарлар асоссиз”, дейди Нурмат Отабеков.
Жаҳон соғлиқни сақлаш ташкилоти 2024 йил 13 апрелдан коронавирус билан касалланиш бўйича кундалик ахборот бериб боришни тўхтатган. Давлатлар миқёсида ҳам шундай. Нурмат Отабековнинг билдиришича, аслида, шунинг ўзиёқ сайёрада коронавирус бўйича эпидемиологик вазият барқарор эканлигини англатади. Қолаверса, САРС-CoV-2 нинг НБ.1.81 штамми кенг кўламда ёйилаётганига доир маълумотларни ЖССТ расман тасдиқлагани йўқ.
“Сир эмас, дунёда коронавирус бўйича шов-шувли ахборотларни тарқатишдан манфаатдор гуруҳлар бор. Айни кунларда эълон қилинаётган бу каби маълумотларни ҳам шундай изоҳласак, тўғри бўлади. Чунки Ер юзида янги тўлқиннинг кузатилиш эҳтимоли қарийб нолга тенг.
Ўзбекистон мисолида айтадиган бўлсак, мамлакатимизда эпидемиологик вазият барқарор. Аҳолида коронавирус штаммига нисбатан оддий респиратор касалликларга бўлгани сингари муносабат аллақачон шаклланган”, дейди мутахассис.
Унинг таъкидлашича, Ўзбекистонмазкур касалликни диагностика қилиш, даволаш имкониятига эга. Ўз навбатида, одамларда бу хасталикка нисбатан жамоавий иммунитет вужудга келган. Нафақат Ўзбекистон, бутун дунёда ҳолат шундай.
Шу билан бирга, Ўзбекистонда COVID-19 га чалинганлар оз миқдорда бўлса ҳам, аниқланиб турганини, аммо мурожаат қилган беморларнинг фақат иккиламчи сурункали касаллиги бўлганларигина шифохонада даволанаётганини билдириб ўтди. Қолганлари хасталик енгил кечганлиги сабабли амбулатор шароитда муолажа оляпти.
“Янги вируслар пайдо бўлди, деган хабарларга келсак, мана, ҳозиргача дунёда коронавируснинг 45 мингга яқин мутациялари юзага келди ва ҳамон бу жараён тўхтагани йўқ. Бироқ ўтган даврда улардан фақат 10-15 таси касаллик чақирди, холос. Шу маънода, мутациялардан ваҳима ясаш керак эмас”, дейди Санепидқўм раиси ўринбосари
Нурмат Отабеков Ўзбекистон ҳудудида қайси вируслар айланиб юрганини кузатиб борувчи мониторинг тизими йўлга қўйилгани, тегишли лабораторияларда беморлардан олинган вирус намуналари доимий равишда текширилиб, таҳлил қилиб борилишини эслатиб ўтди.
Шу маънода, дунёда қайд этилаётган янги штаммлар ҳақида дарҳол шов-шувли хабарлар тарқатишга зинҳор уринмаслик кераклигини, хавотирга ҳеч қандай асос йўқлигини билдирди.
2025 йил бошларида Ўзбекистонда ўткир респиратор вирусли инфекциялар авж олгани ҳақида хабарлар тарқалганди. Нурмат Отабеков хавотирланишга асос йўқлигини, мамлакатда мавсумий респиратор касалликлар тарқалиши билан боғлиқ вазият барқарорлигини маълум қилганди.
“Дарё” пандемиядан кейинги даврда қандай касалликлар кўпроқ кузатилаётгани ҳақида соҳа мутахассислари фикрини жамлаганди.
Изоҳ (0)