Хитой аҳолисини коронавирусга қарши эмлаш мамлакатга 150 миллиард юанга (21,5 миллиард доллар) тушди, деб ёзади South China Morning Post Миллий соғлиқни сақлаш хавфсизлиги бошқармаси (NHSА) маълумотларига таяниб.
Нашр ёзишича, вакцинанинг бир дозаси ўртача 16 юан (1,24 доллар) туради. Аксарият ҳолларда одамлар Sinopharm давлат компанияси ва Sinovac хусусий компанияси вакциналари билан эмланган.
Яна 4,3 миллиард юан коронавирус тестларига сарфланган. Нашрнинг қайд этишича, бу миқдор 2022 йилнинг май ойидан буён маҳаллий бюджетлар ҳисобидан амалга оширилгани учун мамлакатда тестга сарфланган реал суммадан кам.
2022 йилнинг кузидан бошлаб Хитой мунтазам амалда бўлган пандемия чекловларини аста-секин юмшата бошлади: касалланганлар билан алоқада бўлганлар учун карантин муддати қисқартирилди; оммавий ПЗР-тести бекор қилинди ва ҳоказо.
Шу фонда вирус тарқалишининг қайта авж олиши ҳақида хабарлар пайдо бўла бошлади. Декабрь ойи охирида Financial Times Хитой Касалликларни назорат қилиш ва олдини олиш маркази директори ўринбосари Сун Янга таяниб, чекловлар олиб ташлангандан кейинги ойнинг биринчи 20 кунида 250 миллионга яқин одам, яъни аҳолининг деярли бешдан бир қисми касалланганини ёзди.
Бундай маълумотлар бошқа мамлакатларда пандемиянинг янги тўлқини пайдо бўлишидан хавотир уйғотди. Кўплаб давлатлар Хитойдан келувчилар учун талабларни кучайтиришга қарор қилди. Масалан, АҚШ январь ойида бундай одамлардан коронавирус тестининг манфий натижасини талаб қила бошлади, мамлакат бу чорани 10 мартда бекор қилди.
Изоҳ (0)