Ижтимоий тармоқларда қатъий карантин чоралари яна кучайтирилиши, вируснинг янги штаммлари тарқалаётгани, шифохоналарда «оёқ босишга жой йўқ»лиги ҳақидаги аудиоёзувлар тарқалмоқда. Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков мазкур ҳолатга муносабат билдирди.
«Бу аудиоёзувларларни тинглаб кўрсангиз, улар сизга таниш туюлади. Чунки ушбу хабарлар касаллик авж олган ўтган йилги пандемия даврида ҳам ўртага чиққан эди. Буни улардаги лексика ва умумий манзарадан ҳам сезиш қийин эмас.
Дейлик, бу хабарлардан бирида вируснинг янги штамми тарқалиб кетгани ҳақида сўз боради. Ҳолбуки, айни пайтда юртимизда коронавируснинг асосан омикрон штамми аниқланмоқда. Бу беморларнинг 98 фоизида касаллик енгил даражада кечяпти. Мазкур штаммнинг юртимизда тарқала бошлаганига эса ярим йилга яқинлашяпти», — дейди Отабеков.
Унинг сўзларига кўра, Соғлиқни сақлаш вазирлиги ва Санитария-эпидемиологик осойишталик ва жамоат саломатлиги хизмати расмий манбаларида коронавируснинг тарқалиши бўйича сўнгги янгиликлар бериб борилмоқда. Мамлакатда бир кунда ўртача 100-120 та касалланиш қайд этилмоқда. Таъкидланишича, 35 миллион аҳоли орасида — бу жуда кичик кўрсаткич.
«Шундай бўлса-да, COVID-19 га чалинмасликнинг асосий ва энг самарали йўли вакцинация бўлиб турибди. 2 ёки 3 босқичли эмлашни қабул қилган фуқаролар 6 ойдан сўнг бустер дозани олишлари, шундан 6 ой ўтиб, яна қайта эмланишлари мумкин. Юқоридаги асоссиз хабарларни тарқатаётган кимсалар аҳоли орасида хавотир уйғотишга ҳаракат қилаётгани кўриниб турибди. Шу боис фуқаролардан ижтимоий тармоқлардаги ахборотларни соғлом ақл билан баҳолашларини, уларни тарқатаётганда асослилигини текшириб кўришларини сўраймиз», — дея қайд этади мутахассис.
Эслатиб ўтамиз, 23 июнь куни Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонда коронавирус омикрон штаммининг энг юқумли деб айтилаётган Stealth-Omicron BA.2 варианти аниқланганини маълум қилганди. Мамлакатда коронавирус инфекцияси билан касалланиш ҳолати бир неча кундан буён ортмоқда. Хусусан, 25 июнда 139 кишида, 24 июнда — 119 кишида, 22 июнда — 98 кишида, 19 июнда — 93 кишида касаллик қайд этилган.
Нурмат Отабековнинг сўзларига кўра, Ўзбекистонда асосан 20—29 ёшдаги фуқаролар орасида касалланиш ҳолати кузатилмоқда. Бу ёш тоифасидаги беморлар умумий рўйхатга олинганларнинг чорак қисмини ташкил этади.
Изоҳ (0)