Ўзбекистонда грипп ва ўткир респиратор инфекциялар коронавирус билан микс-инфекция касаллиги сифатида айнан эмланмаган ва сурункали касалликлари бор фуқароларда аниқланмоқда. Бу ҳақда АОКАда ўтказилган брифингда Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков маълум қилди.
Хабарга кўра, сўнгги 7 кунликда стационарга ётқизилган беморлар сони 482 нафарни, даволаниб чиққанлар сони 358 нафарни, карантинга олинганлар 2 310 нафарни ва карантиндан чиқарилганлар 1 306 нафарни ташкил этган.
Ҳозирда COVID-19 ни даволашга ихтисослашган шифохоналарда 539 нафар бемор қолмоқда, уй шароитида даволанаётганлар эса 187 нафарни ташкил этмоқда.
Сўнгги 14 кунликда рўйхатга олинган касалликларнинг ёшма-ёш таҳлили:
- 0—14 ёшгача бўлганлар — 12,5 фоизни;
- 15—19 ёшдагилар — 2,1 фоизни;
- 20—29 ёшдагилар — 37,5 фоизни;
- 30—39 ёшдагилар — 15,6 фоизни;
- 40—49 ёшдагилар — 11,5 фоизни;
- 50—59 ёшдагилар — 9,3 фоизни;
- 60 ёш ва катталар — 11,5 фоизни ташкил этди.
Изоҳ (0)