Ўқитувчиларнинг коронавирусга қарши эмланиши мутлоқо бепул ва бунинг учун ҳеч қандай ҳақ олинмайди. Бу ҳақда АОКАда бўлиб ўтган матбуот анжуманида Санитария-эпидемиологик осойишталик ва жамоат саломатлиги қўмитаси раиси ўринбосари Нурмат Отабеков маълум қилди.
Бугун АОКАда Санитария-эпидемиологик осойишталик ва жамоат саломатлиги қўмитаси раиси ўринбосари ва мутасаддилари иштирокида матбуот анжумани бўлиб ўтди. Унда юқумли касалликларнинг олдини олиш ва санитария йўналиши бўйича бажарилган ишлар, ОАВ ҳамда ижтимоий тармоқларда тарқалаётган турли асосланмаган хабарларга асосли жавоблар берилди.
Матбуот анжуманида сўз олган “Дарё” мухбири Ўзбекистондаги мавжуд умумтаълим мактабларида фаолият юритувчи ўқитувчилар йилига икки маротаба коронавирусга қарши эмланишга мажбур бўлиши, ўқитувчида эмлангани ҳақидаги сертификат бўлмаса, у дарс ололмаслиги билан қўрқитилишини айтиб, “Бу қанчалик асосли? Ўқитувчининг коронавирусга қарши эмланиш харажатини ким қоплайди?”, — дея савол берди.
Ўзбекистон шароитида аҳоли коронавирусга қарши бепул эмланади. У хоҳ ўқитувчи бўлсин, хоҳ тиббиёт ходими бўлсин, фарқи йўқ. Ўзбекистонда коронавирусга қарши 8 турдаги вакцина бор ва вакцина олувчи улардан бирини танлаб, бепул эмланиш ҳуқуқига эга. Бу вакциналарнинг 20 фоизи коронавирусга қарши халқаро жамғарма ҳисобидан қопланган бўлса, қолгани давлат бюджети ҳисобидан тўлиқ тўланган.
Вазият мураккаб бўлган пайтда эмланмаган аҳолини ишга қўймаслик ҳақида кўрсатма берилгани ҳам рост. Эндиликда коронавирус бўйича вазият барқарор. Шу сабаб биз эмланишни ихтиёрий амалга ошириш ҳақида тўхтамга келганмиз. Коронавирусга қарши эмланмаган инсонни ишга олмаслик, мактабда дарс соатини бермаслик талаби йўқ, — деди Санитария-эпидемиологик осойишталик ва жамоат саломатлиги қўмитаси раиси ўринбосари Нурмат Отабеков.
Изоҳ (0)