Жаҳон соғлиқни сақлаш ташкилоти (ЖССТ) Африкадан ташқарида маймунчечакнинг тарқалиши оммавий эмлашни талаб қилмайди, деб ҳисобламоқда. Бу ҳақда Reuters хабар берди.
Европа ва Шимолий Америкадаги соғлиқни сақлаш идоралари вирус эндемик бўлган Африкадан ташқарида ушбу касалликка чалиниш бўйича 100 дан ортиқ тасдиқланган ҳолатларни текширмоқда. Бу рақамлар ортиши кутилмоқда, бироқ экспертларнинг таъкидлашича, аҳоли учун умумий хавф даражаси жуда паст.
«Биз вируснинг одамдан одамга юқишини тўхтатмоқчимиз. Вирус эндемик бўлмаган мамлакатларда буни амалга оширса бўлади», — деди ЖССТ эксперти, америкалик эпидемиолог-инфекционист Мария Ван Керхове.
Африкадан ташқарида сўнгги 50 йилдаги энг йирик эпидемия бўлишига қарамай, маймунчечак одамлар ўртасида осонликча тарқалмайди ва мутахассисларнинг таъкидлашича, бу хавф коронавирус пандемиясига тенг келмайди.
ЖССТнинг Европадаги минтақавий бюроси Юқори хавф патогенлари гуруҳи раҳбари Ричард Пебоди ҳам вакциналар ва вирусга қарши воситалар таъминоти нисбатан чекланганини айтди. Контактларни кузатиш ва изоляцияга олиш касаллик тарқалишини назорат қилишнинг асосий чоралари, деди у. Шунингдек, у маймунчечак жуда осон тарқаладиган вирус эмаслигини ва шу пайтгача жиддий касаллик келтириб чиқармаганини таъкидлади. Маймунчечак билан курашиш учун ишлатиладиган вакциналар, ўз навбатида, салбий таъсирга ҳам эга бўлиши мумкинлиги айтилди.
Аввал маймунчечак билан касалланиш ҳолатлари Италия, Швеция, Испания, Буюк Британия, Португалия, АҚШ, Канада ва Австралияда, Бельгия ва Францияда қайд этилгани, ЖССТ маймунчечак авж олиши туфайли фавқулодда йиғилиш ўтказгани тўғрисида хабар берилганди.
Бельгия маймунчечак туфайли мажбурий карантин жорий этган биринчи давлат бўлди.
Ўзбекистон Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонда маймунчечак қайд этилмаганини маълум қилди.
Мавзуга доир: Байден маймунчечакнинг тарқалишини хавотирли деб атади
Изоҳ (0)