Ўзбекистонда дунё бўйича оммалашаётган омикрон штаммининг янги мутациядаги варианти тарқалаётгани тўғрисида хабар берилганди. Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабековнинг сўзларига кўра, мамлакатда асосан 20-29 ёшдаги фуқаролар орасида касалланиш ҳолати кузатилмоқда.
Ўзбекистонда 22 июнь ҳолатига кўра коронавирус инфекцияси билан касалланганлар сони 239 895 нафарни ташкил этиб, улардан 237 791 нафари (99 фоиз) соғайган, 1 637 нафари (0,7 фоиз) вафот этган. 22 июнда — 98 кишида, 19 июнда — 93 кишида, 18 июнда 108 кишида, 17 июнда 90 кишида, 16 июнда 59 кишида касаллик қайд этилганди.
Республика бўйича рўйхатга олинган касалликларнинг ёшма-ёш таҳлили: 14 ёшгача бўлган болалар ўртача 3-4 фоизни, 15-19 ёшдагилар 2-3 фоизни, 20-29 ёшдагилар 24-25 фоизни, 30-39 ёшдагилар 16-17 фоизни, 40-49 ёшдагилар 14-15 фоизни, 50-59 ёшдагилар 9-10 фоизни, 60 ёш ва ундан катталар 16-17 фоизни ташкил этмоқда.
Касаллик манбаи, жумладан: 35-40 фоиз ҳолатда оиладан, 15-20 фоиз ҳолатда бемор қўшнилари ёки қариндошларидан, 7-8 фоиз ҳолатда жамоат жойларида, 5-8 фоиз ҳолатда иш жойида юқтириб олингани аниқланган.
ЖССТ томонидан дунё мамлакатларида омикрон штаммининг Stealth-Omicron BA.2 варианти устувор штаммга айлангани таъкидланмоқда. Ўзбекистонда ҳам ушбу штамм аниқланиб, ҳозирги кунда коронавирус инфекцияси билан касалланишда ушбу штаммнинг учраётгани кузатилмоқда.
Шу билан бирга, мамлакатда коронавирус инфекциясига қарши эмлашда қўлланилган жами вакциналар сони 57,7 миллион дозадан ошган. Улардан: 1-босқич эмланганлар 20 550 541 нафарни, 2-босқичда эмланганлар 16 856 230 нафарни, 3-босқич ва бустер доза билан эмланганлар 20 355 055 нафарни ташкил қилган.
12-18 ёшдаги эмланувчилар учун жами 1 587 480 доза вакцинадан фойдаланилган. Улардан: 1-босқич эмланганлар 863 351 нафарни, 2-босқичда эмланганлар 675 766 нафарни, 3-босқич ва бустер доза билан эмланганлар 48 363 нафарни ташкил қилмоқда.
«Бугунги кунда мамлакатимизда коронавирус инфекцияси бўйича вазият барқарорлиги таъминланиб келинмоқда. Лекин ўтган 2 йил давомида айнан июль август ойларида касалланиш кўтарилгани қайд этилган. Шунинг учун коронавирус инфекциясини тарқалишини олдини олиш мақсадида аҳолини коронавирус инфекциясига қарши эмлаш ва бустер дозаси билан қайта эмлаш ишларини жадаллаштириш катта аҳамиятга эга.
Аҳоли орасида коронавирус касаллиги диагностикаси, клиникаси ва махсус профилактикаси (эмлаш тадбирлари ва бустер дозанинг аҳамияти) бўйича барча турдаги оммавий ахборот воситаларидан фойдаланган ҳолда тарғибот ва ташвиқот ишларини амалга оширишимиз зарур», — дейди Нурмат Отабеков.
Аввалроқ Соғлиқни сақлаш вазирлиги дунёда омикроннинг янада юқумли мутацияси тарқалаётгани ҳақида маълумот берган эди. Унга кўра, халқаро экспертлар омикроннинг янги версиялари дунё бўйлаб кенг тарқала бошлаганидан хавотир билдиришган. BA.2.12.1 субварианти — шулардан бири.
«BA.2.12.1 бошқа мутацияларга нисбатан антитаначаларга осонроқ «чап бериш» хусусиятига эга. Қолаверса, юқувчанлиги, трансмиссивлиги омикроннинг BA.2 версияга нисбатан 23-27 фоиз юқори», – дейилади вазирлик ахборотида.
Қўшимча қилинишича, мазкур мутациянинг ўчоғи Нью-Йорк шаҳри ҳисобланади. У бутун Қўшма Штатларни шиддат билан «забт» этмоқда. Ҳатто мамлакатнинг қатор штатларида аллақачон доминантга айланиб улгурган.
Изоҳ (0)