Жаҳон банки Ўзбекистонга кичик гидроэнергетика соҳасини ривожлантириш ва мамлакат бўйлаб электр таъминоти ишончлилигини оширишга қаратилган янги лойиҳа учун 150 миллион доллар миқдорида имтиёзли кредит ажратишни маъқуллади.
Банк сайтида хабар берилишича, лойиҳа хусусий сектор, жумладан, маҳаллий кичик гидроэлектр станциялари ишлаб чиқувчилари ва банклар иштирокида амалга оширилади.
“2030 йилга бориб Ўзбекистонда электр энергиясига бўлган талаб икки баробарга ошиб, 120 миллиард киловатт соатдан ошиши кутилмоқда. Мамлакатда электр энергияси ишлаб чиқаришнинг ўсишига қарамай, эҳтиёжларнинг 10 фоизга яқини қондирилмаяпти, бу эса электр таъминотида узилишларга олиб келмоқда, айниқса, энергия билан кам таъминланган ҳудудлар ва қишлоқ жойларда” дейилади Жаҳон банки хабарида.
Қайд этилишича, бунга асосий сабаб энергияни узатиш ва тақсимлаш билан боғлиқ муаммолардир.
Мавжуд суғориш каналлари тармоғидан фойдаланувчи қуввати 100 кВт дан 5 МВт гача бўлган кичик гидроэлектростанциялар энергия билан кам таъминланган ҳудудларда электр энергияси ишлаб чиқаришни оширишга қодир. Улар аҳоли ва хусусий секторни электр энергияси билан таъминлаш ишончлилигини оширишда самарали ечим бўлиб, Ўзбекистон ҳудудларини ривожлантиришга ҳам ҳисса қўшиши мумкин.
“Ўзбекистон ҳукумати 3 мингга яқин кичик гидроэлектростанциялар қурилишига сармоя киритишни ва 2026 йилгача уларнинг ўрнатилган қувватини 160 МВтга етказишни режалаштирмоқда. Бу 280 минг кишини қўшимча электр энергияси билан таъминлаш имконини беради”, дейди Жаҳон банкининг Марказий Осиё бўйича минтақавий директори Татьяна Проскурякова.
Хабарда айтилишича, Жаҳон банки томонидан молиялаштирилаётган ва Ўзбекистон Энергетика вазирлиги томонидан 2025—2030 йилларда амалга ошириладиган янги лойиҳа ушбу мақсадга эришишга ёрдам беради.
Лойиҳа 2030 йилга бориб умумий ўрнатилган қуввати 150 МВт гача бўлган кичик ГЭСлар қурилишини молиялаштириш имконини беради. Уларда йилига 520 Гигаватт соатдан ортиқ экологик тоза электр энергияси ишлаб чиқарилиши кутилмоқда.
13 июнь куни Европа тикланиш ва тараққиёт банки Ўзбекистон бўйлаб 110 та суғориш насос станциясини модернизация қилиш учун 250 миллион долларгача бўлган суверен кредит ажратиши маълум қилинганди.
Изоҳ (0)