Андижон вилоятининг Булоқбоши туманидаги Бирлашган маҳалла фуқаролар йиғини ҳудудида жойлашган, қайта модернизация қилинган Шаҳрихон гидроэлектростанциялар каскади таркибидаги Жанубий Фарғона канали ГЭС1 станцияси фойдаланишга топширилди. Бу ҳақда «Дарё» мухбири хабар бермоқда.
Станция ишга туширилиши муносабати билан бўлиб ўтган тантанали маросимда «Ўзгидроэнерго» акциядорлик жамияти ва тегишли гидроэнергетика тизимидаги нуфузли қурилиш корхона ва ташкилотлари, вилоят ва туман раҳбарияти, давлат ва жамоат ташкилотлари масъул ходимлари, фахрийлар ҳамда ёшлар, ОАВ вакиллари иштирок этди.
Ушбу ГЭС 1956 йилда Жанубий Фарғона каналининг ўнг қирғоғидаги ПҚ 144+00 белгиси ҳудудида қурилган. Унинг вазифаси ЖФКда оқиб келаётган сувни керакли миқдорда деривация канали орқали ГЭСга ўтказишдан иборат. Деривация канали 26 м3/секундига сув қабул қилиш қобилиятига эга. Сўнгги маротаба 1978–1979 йилларда реконструкция қилинган.
«Ўзгидроэнерго» матбуот хизматининг маълум қилишича, ушбу ГЭСда модернизация ишлари 2018 йилнинг январь ойида бошланган бўлиб, лойиҳанинг умумий қиймати 5,81 миллион долларни ташкил этади. Лойиҳани амалга ошириш учун 2018 йилда халқаро тендер савдолари эълон қилинган. Унга асосан жамият ҳамда «Энергоредурс» қўшма корхонаси билан умумий қиймати 5,46 миллион долларга тенг шартнома имзоланган. Шундан 4,37 миллион доллар Жаҳон банки ҳамда 1,09 миллион доллар «Ўзсаноатқурилишбанк» АТБ томонидан молиялаштирилган. Модернизация қилишда зарурий гидротехник асбоб-ускуналар Хитойнинг Hunan Allanward Hydro Generating Equipment CO., LTD компанияси томонидан ўз вақтида етказиб берилди. Натижада лойиҳа белгиланган муддатдан тўрт ой аввал якунига етди.
— Модернизациянинг асосий мақсади ГЭСнинг электр энергияси ишлаб чиқариш қувватини ошириш, электротехник, гидромеханик ва гидротехник қурилмаларининг ишончли ишлашини таъминлашдан иборатдир, — дейди «Гидролойиҳа» акциядорлик жамияти директор ўринбосари, лойиҳа бош муҳандиси Сафар Холмўминов. – Лойиҳанинг умумий қуввати 2,2 МВт бўлиб, йиллик ўртача электроэнергия ишлаб чиқариш 17,1 миллион кВт/соатга тенг. Бу ўртача тўққиз ярим мингдан ортиқ аҳолини узлуксиз электр билан таъминланишига хизмат қилади.
Расмий очилиш маросимидан сўнг рамзий тугма босилиб, ГЭС каскади ишга туширилди ва энг илғор технологик ускуналар ёрдамида гидроэнергетик иншоот дастлабки киловаттларни ишлаб чиқара бошлади.
Тадбир доирасида «Ўзгидроэнерго» томонидан тумандаги ижтимоий ҳимояга муҳтож оилаларнинг 23 нафар фарзандларига хатна тўйлари ташкил этилди.
Изоҳ (0)