Каталониянинг “Барселона” клуби собиқ бош мураббийи Хави Эрнандес Саудия Арабистонида фаолиятини давом эттириши мумкин. Бу ҳақда Foot Mercato нашри хабар берди.
Манбага кўра, 45 ёшли испаниялик мутахассис “Ал-Аҳли” клубидан расмий таклиф олган. Ҳозирда жамоани Маттиас Яйссле бошқармоқда, аммо Жидда клуби раҳбарияти мавсум якунлангач, клубга бошқа мураббий олиб келиш ҳақида ўйламоқда.
Гарчи улар Осиё Чемпионлар Лигасининг амалдаги ғолиби ҳисобланса-да, “Ал-Аҳли” Саудия чемпионатида бешинчи ўринда бормоқда. Бу эса раҳбариятни қаноатлантирмаяпти. Шу боис жиддаликлар 37 ёшли немис мутахассисига чиқиш эшигини кўрсатиши мумкин.
Хави “Барселона”да 2021 йил ноябрдан 2024 йил июнга қадар бош мураббий бўлиб ишлаган эди. У шундан бери ҳеч қайси жамоада иш бошлагани йўқ. Мутахассис учун Осиё қитъаси бегона эмас. Сабаби Хави 2019 йилдан 2021 йилгача Қатарнинг “Ас-Садд” клубида фаолият юритган эди.
Изоҳ (0)