«Барселона» Хавининг бош мураббий этиб тайинланганини эълон қилди.
Каталонияликлар матбуот хизмати хабарига кўра, клуб 41 ёшли мутахассис билан 2024 йилгача мўлжалланган шартнома имзолаган.
Хави ушбу дам олиш кунларида Барселонага учиб келиши кутилмоқда, 8 ноябрь, душанба куни эса у жамоа бош мураббийи сифатида таништирилади.
Аввалроқ «Ас-Садд» Хавини товон пули эвазига қўйиб юборишини маълум қилганди. Бироқ кейинчалик 5 миллион евро миқдоридаги компенсацияни «Барселона» тўламоқчи эмаслиги ва бу суммани Хавининг ўзи тўлагани айтилди.
Маълумот учун, Хави 1998 йилдан 2015 йилга қадар «Барселона» шарафини ҳимоя қилган. Футболчилик фаолияти давомида каталонлар билан 25 та соврин қўлга киритган. 2015 йилда Хави «Ас-Садд» жамоасига бориб қўшилган. 2019 йилда футболчилик фаолиятини якунлади ва Қатар клубида мураббийлик қила бошлади. Хави «Ас-Садд» билан мураббий сифатида 7 та совринни қўлга киритди.
«Барселона» 28 октябрь куни «Райо Вальекано»га 0:1 ҳисобида мағлуб бўлганидан сўнг Рональд Куманни истеъфога чиқарганди. Ҳозирда «кўк-анорранглилар»ни «Барселона Б» мураббийи Серхи Бархуан вақтинчалик бошқариб турибди.
Жамоа Ла Лигада 11 ўйинда 16 очко жамғариб, 9-ўринни эгаллаб турибди. Чемпионлар Лигасида эса 4 турдан сўнг 6 очко билан 2-ўринда бормоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)