Дунё ва ўзбек спортига оид 22 ноябрнинг энг муҳим хабарлари дайжести билан танишинг.
Ўзбекистон
Муроджон Аҳмадалиев тантанали равишда кутиб олинди
АҚШда бўлиб ўтган жангда WBA ва IBF камарларини ҳимоя қилган Муроджон Аҳмадалиев (10-0, 7 КО) 22 ноябрь куни Тошкентда тантанали равишда кутиб олинди.
Кутиб олиш маросимида Ўзбекистон бокс федерацияси раҳбарияти, Миллий гвардия қўмондонлиги, ОАВ вакиллари, боксчининг яқинлари ва мухлислар иштирок этди.
Муроджон Тошкент вақти билан 20 ноябрь тонгида бўлиб ўтган жангда чилилик Хосе Веласкесни мағлуб этиб, камарларини ҳимоя қилганди.
Суперлига тарк этадиган иккита клуби номи маълум бўлди
20 ва 21 ноябрь кунлари футбол бўйича Ўзбекистон чемпионатининг 25-тур баҳслари ўтказилди. Тур якунларига кўра, Суперлигани тўғридан-тўғри тарк этадиган иккита жамоа номи маълум бўлди.
Суперлиганинг 12-ўриндаги жамоаси ва Про-Лиганинг учинчи жамоаси ўртасида ўтиш учрашуви ўтказилади. Унда ғолиб бўлган жамоа Суперлиганинг келаси мавсумида иштирок этиш ҳуқуқини қўлга киритади. Про-Лигада учинчи ўринни «Олимпик» жамоаси эгаллади. Суперлигадаги 12-ўрин эгаси эса сўнгги турдан сўнг аниқ бўлади. Айни вақтда «Машъал», «Сурхон» ва «Металлург» хавфли ҳудудда бормоқда.
ПФЛнинг маълум қилишича, ўтиш ўйини 2 декабрь куни Тошкентдаги «Жар» стадионида бўлиб ўтади.
Жаҳон
Гарет Саутгейт Англия терма жамоаси билан амалдаги шартномасини узайтирди
51 ёшли мутахассис Англия билан амалдаги шартномасини 2024 йилнинг ёзига қадар узайтирган. Хабарларга кўра, мутахассис янги битим бўйича йилига 5 млн фунт маош олади.
Саутгейт Англия термасини 2016 йилда қабул қилиб олганди. У билан жамоа ЖЧ—2018 ярим финали ва Евро—2020 финалига қадар етиб борди.
Лига 1 да навбатдаги можаро
Франция чемпионатининг 14-тури доирасида бўлиб ўтиши белгиланган «Лион» — «Марсель» учрашуви 5-дақиқадаёқ тўхтатиб қўйилди.
«Марсель» ярим ҳимоячиси Димитри Пайет бурчак зарбасини ижро этаётган вақтда трибунадан улоқтирилган сув идиши унинг бошига тегган. Ҳакам шундан кейин ўйинни тўхтатган. Узоқ вақт муҳокамалардан кейин ўйин ўтказилмаслиги маълум қилинган.
«Ўйинчилар хавфсизлиги кафолатланмагани боис ҳакам учрашувни давом эттирмаслик қарорига келган. Биз ўйинни давом эттира олмаймиз», — деган стадион сухандони.
Ушбу масала тартиб-интизом қўмитасига оширилган. «Лион» бунинг ортидан техник мағлубият қабул қилиб олиши ҳам мумкин.
Аввалроқ «Ницца» ва «Марсель» ўртасидаги учрашувда ҳам шунга ўхшаш тартибсиз юзага келганди. Унда ҳам Пайет томон трибунадан буюм улоқтирилган, футболчи ушбу буюмни олиб мухлислар томон отганди. Шундан кейин томошабинлар майдонга чиқиб кетган ва оммавий муштлашув келиб чиққанди. Якунда ўйин охирига бормай якунланган ва «Ницца»га техник мағлубият ёзилганди.
Йилнинг энг яхши ёш ўйинчиси аниқланди
«Барселона» ярим ҳимоячиси Педри Tuttosport нашри томонидан йилнинг энг яхши ёш ўйинчисига топшириладиган Golden Boy совринига эга чиқди.
Педри ўтган мавсум топ-5 лигалар ўйинчилари орасида энг кўп майдонда ҳаракат қилган футболчи бўлганди. Каталонлар сафидаги тўлиқ мавсумдан кейин у Испания билан Евро ва Олимпия ўйинларида иштирок этди.
«Бавария» вакцинациядан ўтмаган футболчиларига карантин вақтида маош тўламайди
Мюнхенликлар клуби эмланмаган футболчилар изоляция ёки карантинда бўлган вақт учун маош тўламоқчи эмас.
Футболчилар Эрик-Максим Шупо-Мотинг, Микаэл Кюизанс, Серж Гнабри, Жамал Мусиала ва Йозуа Киммих раҳбарият мажлисига чақирилган. «Бавария» раҳбарияти футболчиларга карантинда бўлган муддат учун пул тўланмаслигини маълум қилган, дея хабар қилмоқда Sport1.
Бу футболчилар орасида тушунмовчиликни келтириб чиқарган. Мазкур қарор туфайли ҳозирга қадар икки марта карантинга олинган Киммих 768 минг евро йўқотиши мумкин.
Хави собиқ шогирдини «Барселона»да кўрмоқчи
Испаниялик мутахассис «Ас-Садд» ҳужумчиси Бағдод Бунежа трансферини хоҳламоқда, дея хабар қилмоқда Diario Sport. Клуб ҳужум чизиғидаги йўқотишлар ва чекланган молиявий имконият сабаб ушбу вариантни кўриб чиқмоқда.
Хави жазоирлик футболчи билан «Ас-Садд»да бирга ишлаган. Бунежа Қатар клубида 2015 йилдан буён тўп суриб келади. Бу вақтда у Қатар чемпионатида 108 ўйин ўтказиб, 128 та гол уришга эришган.
Эслатиб ўтамиз, каталонларнинг марказий ҳужумчилари Мартин Брэйтуэйт ва Серхио Агуэро айни вақтда лазаретда бўлиб турибди.
«Бавария» Педрини сотиб олмоқчи
Мюнхенликлар клуби «Барселона» ярим ҳимоячисига қизиқиш билдирмоқда, дея хабар қилмоқда АS.
«Бавария» 18 ёшли футболчининг вакиллари билан бошланишга улгурган. Немис клуби унга каталонларга нисбатан 4 баробар кўп маош таклиф қилмоқда. «Бавария» бунинг учун ўз трансфер рекордини янгилашга тайёр. Айни вақтда Мюнхен клубининг энг йирик хариди 2019 йил «Атлетико»дан 80 миллион еврога сотиб олинган Люка Эрнандес бўлиб турибди.
Изоҳ (0)