«Мени Гвардиола билан солиштиришлари ёқади, Пеп ва Зиданнинг йўлидан кетишга ҳаракат қиламан». Хави «Барселона» бош мураббийи сифатида илк матбуот анжуманида иштирок этди

Хави Эрнандес «Барселона» бош мураббийи сифатида таништирилди. Испаниялик мутахассис иштирокидаги илк матбуот анжумани ҳам бўлиб ўтди.

«Барселона» 41 ёшли мутахассис билан 2024 йилгача мўлжалланган шартнома имзолади.

Хави каталон бош мураббийи сифатида илк матбуот анжуманида бир қатор саволларга жавоб қайтарди.

«Барселона» ҳақида

Биз дунёнинг энг зўр клубимиз, жамоамиз муваффақияти учун ишлаймиз. Мухлисларни кўрганимдан хурсандман. Энди улар олдида масъулиятли бўлишимиз даркор.

Бу лойиҳа қачон ўз мевасини бериши ҳақида

Биз аллақачон «Эспаньол»га қарши дерби ҳақида ўйлаяпмиз. Ғалаба қозонишга тайёрланишимиз керак. Ундан сўнг кейинги ўйин ҳақида ўйлаймиз. Муваффақиятга эришиш учун кўпроқ ишлаш керак. Бу узоқ муддатли лойиҳа.

Пеп Гвардиола ҳақида

Мени Пеп билан солиштиришлари ёқади. У менга футболчи ва мураббий сифатида ўрнак. Менимча, Гвардиола дунёнинг энг яхши мураббийи.

Асосий ғояси ҳақида

Футболчиларни тезроқ сафга қайтишини кутиш лозим. Улар ўзларини жамоанинг бир қисмидек ҳис қилишлари керак. Бу ғояни уларга сингдириш керак.

Етакчилар ҳақида

Раҳбариятда ва ходимлар орасида ҳам бўлиши керак. Ҳар ким ўз вазифасини бажариши лозим.

Турли хил етакчилар бор. Футболчилар етакчилик қобилиятларини ошириши учун керакли кўрсатмаларни берамиз. Лионель Месси ажойиб етакчи, аммо худди Иньеста сингари у ҳам тортинчоқ эди. Пуйоль эса кийим алмаштириш хонасида ҳам, майдонда ҳам ҳақиқий лидер эди.

Клуб дуч келадиган талаблар ҳақида

Менинг битта устунлигим бор — жамоани яхши биламан ва бир нечта футболчи билан ҳам танишман. Танқидлар, албатта, бўлади. «Барселона» — дунёнинг қийин жамоаси. Бу ерда яхши ўйнаш ва ғалаба қозониш даркор. 90 дақиқада 1:0 ҳисобида ғолиб бўлиш — қониқарсиз натижа. Клуб олдинги муваффақиятга қайтиши учун ҳаракат қилиш лозим. Ўйлайманки, Зидан ва Пеп қаторига қўшиламан.

Бразилия терма жамоасидан тушган таклиф ҳақида

Менда Бразилия терма жамоасидан таклиф бор эди. Аввалига, Титенинг ёрдамчиси вазифасида ишлаб, Жаҳон Чемпионатидан сўнг бош мураббийга айланишим керак эди. Аммо мен «Барселона»га қайтишни маъқул кўрдим.

Хави, «Барселона» бош мураббийи

Маълумот учун, Хави 1998 йилдан 2015 йилга қадар «Барселона» шарафини ҳимоя қилган. Футболчилик фаолияти давомида каталонлар билан 25 та соврин қўлга киритган. 2015 йилда Хави «Ас-Садд» жамоасига бориб қўшилган. 2019 йилда футболчилик фаолиятини якунлади ва Қатар клубида мураббийлик қила бошлади. Хави «Ас-Садд» билан мураббий сифатида 7 та совринни қўлга киритди.

«Барселона» 28 октябрь куни «Райо Вальекано»га 0:1 ҳисобида мағлуб бўлганидан сўнг Рональд Куманни истеъфога чиқарганди. Унинг ўрнини Хави эгаллади.