Дунё ва ўзбек спортига оид 5 ноябрь кунининг энг муҳим хабарлари дайжести билан танишинг.
Ўзбекистон
Абдумалик Ҳалоков олтин медал учун рингга кўтарилади
Белград шаҳри мезбонлигида ўтаётган бокс бўйича Жаҳон чемпионатининг финал баҳслари бўлиб ўтади.
Финал йўлланмасини қўлга киритган ягона ўзбекистонлик боксчи Абдумалик Ҳалоков (-60 кг) 5 ноябрь куни ҳал қилувчи жангда франциялик Софиан Оумиага қарши рингга кўтарилади. Мазкур жанг Тошкент вақти билан 22:30 дан кейин бошланади.
«Насаф» ОФК Кубоги финалида майдонга тушади
Қаршининг «Насаф» клуби ОФК Кубоги финал баҳсида сафарда Баҳрайннинг «Ал-Муҳаррақ» жамоасига қарши майдонга тушади.
Учрашув Тошкент вақти билан соат 21:00 да старт олади. Беллашувни Футбол ТВ телеканали жонли эфирда намойиш қилади.
Қайд этиш керак, «Насаф» 2011 йилда мазкур мусобақа ғолибига айланганди. Рўзиқул Бердиев шогирдларида 10 йиллик танаффусдан кейин ушбу натижани такрорлаш имконияти мавжуд.
Суперлиганинг 24-туридан ўрин олган икки ўйин бўлиб ўтди
Футбол бўйича Ўзбекистон Суперлигасининг 24-туридан ўрин олган икки ўйин бўлиб ўтди. Унда «Локомотив» Тошкентда «Сўғдиёна»дан устун келди. «Навбаҳор» эса «Металллург»ни енгди.
Тур доирасидаги қолган ўйинлар 6 ноябрь куни бўлиб ўтади.
Жаҳон
«Ас-Садд» Хавини «Барселона»га қўйиб юборди
Қатарнинг «Ас-Садд» жамоаси Хавини қўйиб юбориш масаласида «Барселона» билан келишувга эришганини тасдиқлади.
Қатар жамоаси шартномада кўрсатилган товон пули тўланганидан кейин Хавининг «Барселона»га ўтишига рози бўлди. Хабарларга кўра, Хавининг товон пули 5 миллион евро ташкил қилади.
Бироқ Mundo Deportivo нашри каталонларнинг Хави учун 5 миллион евро товон пули тўлаш борасида «Ас-Садд» билан келишувга эришмаганини хабар қилди. Қайд этилишича, «кўк-анорранглилар» компенсацияни тўлаш ниятида эмас ва мутахассисни текинга қўлга киритмоқчи.
Иммобиле «Лацио» рекордини ўрнатди
«Лацио» ҳужумчиси Чиро Иммобиле Европа Лигаси доирасидаги «Марсель»га қарши ўйинда гол урди.
31 ёшли ҳужумчи учун бу «Лацио» сафидаги 160-гол бўлди. У шу тариқа жамоа сафида урилган голлар борасида Силвио Пиолани ортда қолдирди ва клуб рекордини ўрнатди.
Силвио Пиолага 159 та гол уриш учун 243 та ўйин керак бўлганди. Иммобиле эса 233 ўйинда 160 та гол уришнинг уддасидан чиқди.
Стефано Пиоли — А Сериянинг октябрь ойидаги энг яхши мураббийи
«Милан» бош мураббийи Стефано Пиоли Италия А Сериясининг октябрь ойидаги энг яхши мураббийи деб топилди.
«Милан» октябрь ойида А Серия доирасидаги 5 учрашувнинг барчасида ғалаба қозонди. Пиоли шогирдлари «Аталанта» (3:2), «Верона» (3:2), «Болонья» (4:2), «Торино» (1:0) ва «Рома»ни (2:1) мағлуб этди.
Миланликлар 11-турдан сўнг 31 очко жамғариб, А Серия жадвалида иккинчи ўринда бормоқда. Пешқадам «Наполи»нинг ҳисобида ҳам 31 очко бор.
Барча даврларнинг энг кўп маош олувчи спортчилари рейтинги тузилди
Спорт бизнесига ихтисослашган Sportrico нашри барча даврларнинг энг кўп маош олувчи 25 нафар спортчиси рейтингини тузди.
Нашр даромадлар рейтингини тузишда инсайд маълумотлар, ўз тадқиқотлари ва бошқа оммавий ахборот воситалари, жумладан, Forbes маълумотларига асосланган. Ҳар бир спортчининг даромади маош, мукофот пули, реклама шартномалари, гонорар ва ҳоказолар ҳисобидан шакллантирилган.
Топ-25 таликка саккизта спорт тури вакиллари киритилди, уларнинг умумий даромади 25,5 миллиард долларни ташкил қилди.
Барча даврларнинг энг кўп маош олувчи 25 нафар спортчиси:
1. Майкл Жордан (баскетбол) – 2,62 млрд доллар
2. Тайгер Вудс (голф) – 2,1 млрд
3. Арнольд Палмер (голф) – 1,5 млрд
4. Жек Никлаус (голф) – 1,38 млрд
5. Криштиану Роналду (футбол) – 1,24 млрд
6. Флойд Мейвезер-кичик (бокс) – 1,2 млрд
7. Леброн Жеймс (баскетбол) – 1,17 млрд
8. Лионель Месси (футбол) – 1,14 млрд
9. Михаэль Шумахер (автопойга) – 1,13 млрд
10. Рожер Федерер (теннис) – 1,12 млрд
11. Фил Микелсон (голф) – 1,08 млрд
12. Дэвид Бекҳэм (футбол) – 1,05 млрд
13. Кобе Брайант (баскетбол) – 930 млн
14. Шакил Онил (баскетбол) – 870 млн
15. Грег Норман (голф) – 815 млн
16. Майк Тайсон (бокс) – 775 млн
17. Алекс Родригес (бейсбол) – 650 млн
18. Мэнни Пакьяо (бокс) – 630 млн
19. Кевин Дюрент (баскетбол) – 625 млн
20. Льюис Ҳемилтон (автопойга) – 620 млн
21. Неймар (футбол) – 615 млн
22. Жефф Гордон (автопойга) – 595 млн
23. Оскар Де Ла Ҳойя (бокс) – 580 млн
24. Пейтон Меннинг (американча футбол) – 570 млн
25. Дерек Житер (бейсбол) – 555 млн.
Изоҳ (0)