Дунё ва ўзбек спортига оид 28 октябрь кунининг энг муҳим хабарлари дайжести билан танишинг.
Ўзбекистон
Амалдаги жаҳон чемпиони Миразизбек Мирзахалилов америкалик боксчига мағлуб бўлди
Сербиянинг Белград шаҳрида бокс бўйича ЖЧ—2021 баҳсларининг 4-кунидан ўрин олган баҳслар ўтказилмоқда.
-57 кг вазн тоифасида амалдаги жаҳон чемпиони Миразизбек Мирзахалилов америкалик Жамал Ҳарвига қарши рингга кўтарилиб, 2:3 ҳисобида мағлубиятга учради. Амалдаги жаҳон чемпиони бўлган Миразизбек мусобақа билан хайрлашди.
+92 кг вазнда ҳаракат қиладиган Лазизбек Муллажонов эса эронлик Амири Пуриани 4:1 ҳисобида мағлуб этди ва кейинги босқич йўлланмасини ҳал қилди.
-67 кг вазн тоифасида ҳаракат қиладиган Асадхўжа Мўйдинхўжаев фаластинлик Аҳмед Харарага қарши рингга кўтарилди ва 5:0 ҳисобида ғалаба қозонди. Шу тариқа Мўйдинхўжаев 1/8 финалга йўлланмани қўлга киритди.
«Бунёдкор» ва «ОКМК» Ўзбекистон Кубогининг ярим финалига йўлланмани қўлга киритди
Ўзбекистон Кубоги 1/4 финалидан ўрин олган ўйинлар 28 октябрь куни бўлиб ўтди. Унда «ОКМК» сўнгги дақиқаларда урилган гол эвазига «Қизилқум»ни енгди. «Бунёдкор» эса «Сурхон»дан устун келди.
Жаҳон
Роналду ва Жоржина Родригес эгизак фарзанд кутмоқда
«Манчестер Юнайтед» ҳужумчиси Криштиану Роналду ва унинг қайлиғи Жоржина Родригес эгизак фарзанд кутаётганини маълум қилди.
«Биз эгизак фарзанд кутаётганимизни эълон қилишдан хурсандман. Қалбимиз меҳрга тўла. Сизлар билан учрашишни интиқлик билан кутамиз», — деб ёзади Роналду Instagram саҳифасида.
Роналду бир неча йилдан бери Родригес билан бирга ҳаёт кечиради. Уларнинг 3 ёшли Алана Мартина исмли қиз фарзанди бор. Шунингдек, Родригес Роналдунинг суррогат онадан туғилган уч нафар фарзандига ҳам оналик қилади.
Лаутаро Мартинес «Интер» билан шартномасини узайтирди
Ҳужумчи Лаутаро Мартинес «Интер» билан 2026 йилнинг июнига қадар мўлжалланган янги шартномага имзо чекди.
Таниқли инсайдер Фабрисио Романонинг ёзишича, ҳужумчининг «Интер» билан аввалги шартномасида 111 миллион евро миқдорида товон пули белгиланган эди. Янги битимда эса товон пули миқдори кўрсатилмаган.
Фатининг жароҳати жиддий бўлиб чиқмади
«Барселона» ярим ҳимоячиси Ансу Фатининг жароҳати жиддий бўлиб чиқмади, деб хабар қилмоқда Аs.
Қайд этилишича, 18 ёшли футболчининг жароҳати жарроҳлик амалиётини талаб қилмайди. Қайта тикланиш учун эса унга 7—10 кун керак бўлади.
Аввалроқ Фатининг тиззасидаги оғриқ туфайли номаълум муддатга сафдан чиққани ҳақида хабар берилганди.
Хави «Барселона»ни бошқаришга рози бўлди
Қатарнинг «Ас-Садд» клуби бош мураббийи Хави «Барселона»ни бошқаришга рози бўлган. Бироқ келишувни амалга оширишда бир қатор тўсқинликлар бўлиши мумкин.
Diario Sport’га кўра, ҳозирда каталон клуби «Ас-Садд» билан Хавининг шартномасини бекор қилиш борасида иш олиб бормоқда. Шартномада мутахассиснинг товон пули 1 миллион евро этиб белгиланган.
Аввалроқ RAC1 ҳам Хавининг «Барселона»га розилик берганини тасдиқлаганди. Хавининг ноябрь ойидаги ФИФА кунларидан кейин ўз штаби билан жамоа бошқарувини ўз қўлига олиши кутилмоқда.
Унгача эса жамоа бош мураббийи вазифасини вақтинчалик Серхи Бархуан бажариб туради.
«Барселона» Куманни истеъфога чиқаргани учун унга 12 миллион евро тўлаб беради
«Барселона» Рональд Куманни истеъфога чиқаргани учун нидерландиялик мутахассисга катта миқдорда компенсация тўлайди.
El Pais хабарига кўра, 58 ёшли Куманга 12 миллион евро тўланиши керак.
Эслатиб ўтамиз, Куман Ла Лига доирасида «Райо Вальекано»дан учралган мағлубиятдан сўнг ўз лавозимидан озод этилганди.
«Бавария» 43 йил аввалги антирекордини такрорлади
«Бавария» Германия Кубоги 1/16 доирасида «Боруссия М»га мағлуб бўлди (0:5).
Бу Мюнхен клуби учун мусобақа тарихидаги энг йирик мағлубият бўлди. Шунингдек, бу «Бавария» учун барча мусобақаларда 1978 йилдан кейинги энг йирик мағлубият ҳисобланади. Жамоа ўшанда «Фортуна»га 1:7 ҳисобида мағлуб бўлганди. Шундан кейин «Бавария» бирор марта ҳам 5 ёки ундан кўп гол фарқи билан мағлубиятга учрамаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)