Кубок ярим финалига йўл олган «аждарлар», ЖЧни ғалаба бошлаган Шаҳобиддин ва Сульшернинг жамоада қолишини хоҳлаётган Роналду. Энг сўнгги спорт янгиликлари

Дунё ва ўзбек спортига оид 29 октябрь кунининг энг муҳим хабарлари дайжести билан танишинг.

Ўзбекистон

Ўзбекистон Кубоги 1/4 финалидан ўрин олган ўйинда «Насаф» ва «Сўғдиёна» ўзаро тўқнаш келди. Беллашувда Қарши клубининг 1:0 ҳисобида қўли баланд келди ва ярим финалга йўл олди.

Шу тариқа 1/2финалга йўл олган барча жамоалар номи аниқ бўлди:

Амалдаги жаҳон чемпиони Шаҳобиддин Зоиров сербиялик боксчини мағлуб этди

Сербиянинг Белград шаҳрида бокс бўйича ЖЧ—2021 баҳсларининг 29 ноябрь кунги баҳслари ўтказилмоқда.

-52 кг вазн тоифасида амалдаги Жаҳон чемпиони Шаҳобиддин Зоиров сербиялик Тамир Галановга қарши рингга кўтарилди. Учала раундда устунликка эришган Зоиров рақибини 5:0 ҳисобида енгди ва кейинги босқич йўлланмасини ҳал қилди.

-92 кг вазнда Мадиёр Саидраҳимов беларуслик Владислав Смягликовни мағлуб этиб, мусобақанинг кейинги босқичига йўл олди.

Шунингдек, 29 ноябрь куни Абдумалик Ҳалоков ва Шаҳрам Ғиёсов ҳам мусобақадаги илк жангини ўтказади.

Жаҳон

Криштиану Роналду «Ливерпуль»дан учралган 0:5 ҳисобидаги мағлубиятдан кейин «Манчестер Юнайтед» футболчиларини Оле-Гуннар Сульшерни  қўллаб-қувватлашга чақирди.

Manchester Evening News’нинг ёзишича, португалиялик ўз жамоадошларини истеъфога чиқарилиш эҳтимоли бўлган Сульшерни клубда олиб қолмоқчи. У футболчиларни бирлаштиришга ҳаракат қилмоқда.

«Интер» Кристиан Эриксенни сотишга тайёр, унга Италияда футбол ўйнаш мумкин эмас

Евро—2020 да юрак тўхташини бошдан кечирган даниялик футболчи «Интер»ни тарк этиши мумкин, деб ёзмоқда Football Italia.

Аввалроқ «Интер» 29 ёшли футболчи Италия қонунларига кўра, профессионал футбол билан шуғуллана олмаслигини ва шу сабаб мавсум қайдномасига киритилмаганини маълум қилганди.

Футболчига кардиовертер-дефибриллятор ўрнатилган, ушбу мослама билан футбол ўйнаш Италияда тақиқланган. Шу сабаб миланликлар уни бошқа мамлакат клубига сотиб юборишга тайёр.

Хави «Барселона» бошқарувидаги илк ўйинини қачон ўтказиши аниқ бўлди

Қатарнинг «Ас-Садд» клуби бош мураббийи Хавининг «Барселона»ни бошқариши кутилмоқда.

Журналист Рамон Салмуррига кўра, испаниялик мутахассис Ла Лига доирасида 6 ноябрь куни бўлиб ўтадиган «Сельта»га қарши ўйинда каталон клубида мураббий сифатида дебют қилади.

«Сельта»га қарши ўйингача «Барселона» «Алавес» (Ла Лига) ва «Динамо К» (Чемпионлар Лигаси) билан баҳс юритиши керак.

Роналдунинг эгизак фарзанд кутаётгани ҳақидаги пости Instagram’да 27 млн лайк йиғди

«Манчестер Юнайтед» ҳужумчиси Криштиану Роналдунинг Instagram’даги эгизак фарзанд кутаётгани ҳақидаги пости спортга оид постлар орасида энг кўп лайк йиғди.

28 октябрь куни Роналду ва қайлиғи Жоржино Родригес билан эгизак фарзанд кутаётганини эълон қилганди. 29 октябрь санаси 19:00 ҳолатига кўра ушбу пост 27 миллиондан ортиқ лайк йиғган.

Бунгача Instagram’да спортга оид постлар ичида энг кўп лайк йиғган расм Лионель Мессига тегишли эди. Унинг оиласи қуршовида «ПСЖ» либосидаги пости 22 миллионта лайк йиғган.