Дунё ва ўзбек спортига оид 4 ноябрь кунининг энг муҳим хабарлари дайжести билан танишинг.
Ўзбекистон
Абдумалик Ҳалоков Жаҳон чемпионатида камида кумуш медални нақд қилди
Белград шаҳри мезбонлигида ўтаётган бокс бўйича Жаҳон чемпионатининг ярим финал баҳслари 4 ноябрь, пайшанба куни бўлиб ўтмоқда.
1/2 финал босқичида иштирок этаётган Абдумалик Ҳалоков (-60 кг) эронлик Даниял Шоҳбахшга қарши рингга кўтарилиши керак эди. Аммо эронлик спортчи жароҳат сабаб жангга чиқмади ва Ҳалоков финалга тўғридан-тўғри йўлланмани қўлга киритди. У ҳал қилувчи жангда франциялик Софиан Оумиага қарши тўқнаш келади.
Шунингдек, 4 ноябрь куни ярим финал доирасида Мадиёр Саидраҳимов ҳам ўз жангини ўтказади. Унинг жанги Тошкент вақти билан 00:30 дан сўнг бошланади.
Суперлига 24-тур ўйинларига старт берилди
Футбол бўйича Ўзбекистон Суперлигасининг 24-туридан ўрин олган икки ўйин бўлиб ўтди. Унда «ОКМК» ўз майдонида «Андижон» устидан қийин ғалабага эришди. «Бунёдкор» эса пенальтидан гол уриб, «Қизилқум»ни енгди.
Жаҳон
Англия терма жамоасининг ноябрь ойидаги ўйинларга чақирилган таркиби эълон қилинди
Англия терма жамоаси бош мураббийи Гарет Саутгейт ЖЧ—2022 саралаши доирасидаги Албания (12 ноябрь) ва Сан-Маринога (15 ноябрь) қарши ўйинлар учун чақирилган таркибни эълон қилди.
Дарвозабонлар: Сем Жонстон, Жордан Пикфорд, Аарон Рэмсдейл;
Ҳимоячилар: Трент Александер-Арнольд, Бен Чилуэлл, Конор Коуди, Рис Жеймс, Ҳарри Магуайр, Тайрон Мингз, Люк Шоу, Жон Стоунз, Кайл Уокер;
Ярим ҳимоячилар: Жуд Беллингҳем, Жордан Ҳендерсон, Мэйсон Маунт, Келвин Филлипс, Деклан Райс, Жеймс Уорд-Проуз;
Ҳужумкор ўйинчилар: Тэмми Абраҳам, Филип Фоден, Жек Грилиш, Ҳарри Кейн, Маркус Рэшфорд, Букайо Сака, Раҳим Стерлинг.
«Барселона» 5 ноябрь куни Хавини жамоа бош мураббийи сифатида эълон қилади
«Ас-Садд» бош мураббийи Хави «Барселона»ни бошқаришга яқин турибди.
4 ноябрь куни иккала клуб вакиллари музокара ўтказган ва қониқарли натижаларга эришган.
Diario Sport ва Каталониянинг бошқа ОАВлари «Барселона»нинг Хавини расман жамоа бош мураббийи сифатида 5 ноябрь, жума куни эълон қилишни режалаштираётганини маълум қилган. Мутахассиснинг «кўк-анорранглилар» бошчилигидаги дебюти 20 ноябрь куни «Эспаньол»га қарши ўйинда бўлиши мумкин.
АПЛда октябрь ойининг энг яхши мураббийи бўлиш учун номзодлар эълон қилинди
Англия Премьер Лигаси октябрь ойининг энг яхши мураббийи бўлиш учун номзодлар рўйхатини эълон қилди.
Номзодлар сифатида Юрген Клопп («Ливерпуль», 2 ғалаба, 2 дуранг), Дэвид Моес («Вест Ҳэм», 3 ғалаба ва 1 мағлубият), Томас Тухель («Челси», 4 ғалаба) ва Патрик Виэйра («Кристал Пэлас», 1 ғалаба ва 3 дуранг) кўрсатилган.
Сентябрь ойида «Арсенал» устози Микель Артета энг яхши мураббий деб топилганди.
Шунингдек, Лига ойнинг энг яхши футболчиси номига даъвогарлик қилаётган ўйинчилар номини ҳам эълон қилди.
- Бен Чилуэлл («Челси») — 4 ўйинда 3 гол;
- Максвелл Корне («Бёрнли») — 3 ўйинда 3 гол;
- Филип Фоден («Манчестер Сити») 4 ўйинда 3 гол ва 1 голли узатма;
- Валентино Ливраменто («Саутҳэмптон») — 4 ўйинда 1 гол;
- Аарон Рэмсдейл («Арсенал») — 4 ўйинда 17 та сейв, 2 та «қуруқ» ўйин;
- Деклан Райс («Вест Ҳэм») 4 ўйинда 1 гол ва 1 голли узатма;
- Муҳаммад Салоҳ («Ливерпуль») 4 ўйинда 5 та гол ва 4 та голли узатма;
- Юри Тилеманс («Лестер») — 4 ўйинда 2 та гол.
Левандовски Чемпионлар Лигасида ҳафтанинг энг яхши ўйинчиси бўлди
«Бавария» ҳужумчиси Роберт Левандовски Чемпионлар Лигасида ҳафтанинг энг яхши ўйинчиси деб топилди. Польшалик ҳужумчи «Бенфика»га қарши ўйинда ҳет-трик ва 1 та голли узатма муаллифига айланди.
Шунингдек, ушбу соврин учун қуйидаги футболчилар даъвогарлик қилганди.
- Педру Гонсалвеш («Спортинг») — «Бешиктош»га қарши баҳсда (4:0) дубль;
- Криштиану Роналду («Манчестер Юнайтед») — «Аталанта»га қарши ўйинда (2:2) 2 та гол;
- Пауло Дибала («Ювентус») — «Зенит»га қарши беллашувда (4:2) 2 та гол ва 1 та ассист.
«Ливерпуль» Чемпионлар Лигаси гуруҳ босқичи 4-турида «Атлетико»ни мағлуб этди (2:0).
Шу тариқа мерсисайдликларнинг барча мусобақалардаги мағлубиятсиз серияси 25 та ўйинга етди (18 ғалаба, 7 дуранг). Бу клуб рекорди ҳисобланади.
«Қизиллар» навбатдаги ўйинда 7 ноябрь куни АПЛ доирасида «Вест Ҳэм» билан баҳс юритади.
Дембеле 3—4 ҳафтага сафдан чиқди
«Барселона» ярим ҳимоячиси Усмон Дембеле яна жароҳат олди.
Франциялик вингернинг сон суяги шикастланган. Клуб тикланиш вақти ҳақида маълумот бермаган, бироқ As Дембеленинг 3—4 ҳафтага сафдан чиққани хабар қилмоқда.
Дембеле 2 ноябрь куни Чемпионлар Лигаси доирасида «Динамо К»га қарши ўйинда июнь ойидан бери илк бор майдонга тушганди.
Изоҳ (0)