Англиянинг “Тоттенҳэм” клуби даниялик мутахассис Томас Франк жамоанинг янги бош мураббийи этиб тайинланганини эълон қилди. 51 ёшли мураббий билан 2028 йилга қадар мўлжалланган шартнома имзоланди.
Лондон клуби расмий баёнотида қуйидагиларни таъкидлади:
Томас Франк футбол оламидаги энг илғор ва инновацион бош мураббийлардан бири ҳисобланади. У футболчилар ва жамоани ривожлантириш борасида катта тажрибага эга. Янги мавсумни сабрсизлик билан кутяпмиз.
Аввалроқ оммавий ахборот воситаларида “Брентфорд” клуби Томас Франкни “Тоттенҳэм”га тахминан 12 миллион евро эвазига қўйиб юборишга рози бўлгани ҳақида хабарлар тарқалган эди. У Европа Лигасидаги ғалабаси билан клубнинг узоқ йиллик совринсиз даврига барҳам берган Анже Постекоглу ўрнини эгаллайди.
Франк 2018 йил октябридан буён “Брентфорд” бош мураббийи лавозимида фаолият юритиб келаётган эди. Унинг қўл остида “асаларилар” сўнгги йилларда Англия Премьер Лигасида яхши ўйинлар намойиш этиб келаётган эди ва бир неча ёш футболчиларни юқори даражага олиб чиқишга муваффақ бўлди.
2024/25 йилги мавсум якунларига кўра, “Тоттенхем” АПЛда 17-ўринни эгаллади, “Брентфорд” эса 10-поғонада мавсумни якунлади.
Изоҳ (0)