Лондон қироли. «Арсенал» АПЛ жорий мавсумидаги барча дербида ғалаба қозоняпти

«Арсенал» Премер Лига 20-турида «Тоттенҳэм»дан устун келди (2:0).

Шу тариқа «канонирлар» АПЛ 2022/23 йилги мавсумида еттинчи дербини ўз фойдасига ҳал қилди. Микель Артета шогирдлари ушбу мавсумда ҳали бирорта Лондон жамоасига очко улашмади.

Биринчи даврада ҳам «Тоттенҳэм» таслим этилганди (3:1). Шунингдек, «Арсенал» ўз уйида «Фулҳэм» (2:1) ва «Вест Ҳэм»ни (3:1), сафарда эса «Кристал Пэлас» (2:0), «Брентфорд» (3:0) ҳамда «Челси»ни (1:0) таслим этишга муваффақ бўлди.

Қайд этиш керак, «Арсенал» сафардаги тўртта ўйинда ўз дарвозасидан бирорта тўп олиб чиқмаган, рақиблар дарвозасига эса 7 та гол урган.

«Канонирлар» АПЛда 18 та ўйиндан кейин 47 очко тўплаган ҳолда пешқадам бўлиб турибди.