Жейми Варди “Лестер” сафидаги сўнгги ўйинини ўтказди. У ўз номини “тулкилар” тарихига олтин ҳарфлар билан ёзган, Премьер Лиганинг энг ёрқин афсоналаридан бирига айланган футболчидир. Жейми АПЛдаги илк ўйинини 27 ёшида ўтказган бўлса-да, бутун Англия футболи ёқимтойига айланишга улгурган.
Варди — тақдир эркатойларидан эмас
Вардини омадли футболчи дейишади. Аммо у футболга тасодифан кириб келганлардан эмас, балки ҳар қадамида учраган қийинчиликларни енгиб, шу даражага эришган инсон. Варди 16 ёшида “Шеффилд Уэнздей” академиясидан бўйи паст бўлгани сабабли ҳайдалган, шундан кейин у саккизинчи дивизион жамоаси “Стоксбриж”да тўп сура бошлайди. Футболдан даромад бўлмагани боис, у паралел равишда турли соҳаларда ишлашга мажбур эди.
2007 йилда эса яна бир зарба: суд қарори билан уй қамоғига тушиб қолди. Шу сабабли баъзи ўйинларда фақат биринчи бўлимни ўйнаб, белгиланган вақтда уйга қайтиши керак эди. Ким ўйлабди дейсиз, айнан шу йигит 8 йилдан сўнг Англия Премьер Лигаси тарихидаги энг ёрқин ҳужумчилардан бирига айланишини?
“Лестер” эртаги
2012 йил 18 май куни “Лестер” уни атиги 1 миллион фунтга сотиб олади. Бу тўртинчи дивизионда ҳаракат қиладиган ўйинчилар учун жуда рекорд даражадаги сумма эди. Дастлабки мавсум Варди жамоага мослаша олмайди ва мухлислар томонидан танқидлар остида қолади. Аммо иккинчи мавсумда “Лестер” Чемпионшип ғолибига айланиб, элит двизионга йўл олади.
2015/16 йилги мавсум – Вардининг (ва “Лестер”нинг) олтин даврлари. “Тулкилар” барча стреотипларни бузиб ташлаб Премьер Лига чемпионига айланади. Жамоа 2014/15 йилги мавсум 30-турдан кейин қуйи поғоналардан бирини эгаллаб турган бўлса, бир йил ўтиб – чемпионга айланди. Варди ўша мавсумда 24 та гол уриб, Англия Премьер Лигаси тарихида кетма-кет 11 ўйинда гол урган илк футболчига айланди.
13 йил, 500 та ўйин ва 200 та гол
Вардининг “Лестер”даги карьераси рамзий маънода якун топди. Яъни у 2012 йил 18 майда жамоага қўшилган эди, айнан 2025 йил 18 май куни, яъни роппа-роса 13 йилдан сўнг, у клубдаги 500-ўйинини ўтказди ва бу ўйинда 200-голини урди. Бутун стадион уни оёқда туриб кузатди. Бу – чинакам клуб афсонасининг хайрлашуви эди.
Вардининг феномени нимада?
Жейми — ҳозирги замонда камдан-кам учрайдиган “кўча футболчиси” ҳисобланади. У футболни шунчаки ўйнамайди, балки “King Power”да йиғилган мухлислари учун ҳақиқий шоу уюштириб бера оладиган ҳужумчи эди.
Хўш, Вардининг феномени нимада? Нима учун уни оддий мухлислар ҳам, бетараф томошабинлар ҳам жуда яхши кўради?
Биринчидан, бу – Вардининг босиб ўтган йўли. Саккизинчи дивизиондан, электрон билагузук билан ўйнаган кундан тортиб (уй қамоғида бўлган пайти унга махсус мослама ўрнатилгам — таҳририят), Премер Лиганинг энг яхши ҳужумчиларидан бирига айлангунча бўлган йўл жуда қисқа ва кучли тарихга эга.
Жейми Англия Премьер Лигасидаги илк ўйинини 27 ёшида ўтказди, бироқ бу унга лига тарихида унутилмас из қолдиришга тўсқинлик қилмади. Бу – киноларга хос воқеа. Варди – тўп ортидан югурадиган ва бошқалар вазият яратишини кутадиган ҳужумчилардан эмас. У – ҳақиқий жангчи. Дарвоза кўряпсанми? Зарба бер. Курашиш керакми? Охиригача жанг қил. Варди айнан шундай ўйнайди. Унда ҳар доим профессионаллардан кўра кўпроқ кўча футболчиси руҳи бўлган.
Яна бир муҳим жиҳат шуки, Варди — бошқа стреотипларни ҳам синдирган футболчи. Футбол ҳозирги кунда шунчаки ўйин эмас. Ҳар йили футболчилар тобора профессионаллашиб бормоқда: тўғри овқатланиш, кун тартиби, қўшимча машғулотлар, алкоголдан воз кечиш ва ҳоказо. Бу яхши, албатта. Аммо тажрибали мухлисларга ўша эски замон футболи етишмайди. Варди айнан шу эски руҳни АПЛга олиб кирарган эди.
Ҳужумчи бир неча бор тан олган: у ҳеч қачон 100 фоизлик профессионал ҳаёт тарзига риоя қилмаган. Ҳозирги футболда ким ўйиндан олдин йўлакда энергетик ичимлик билан турган бўлади? “Учта энергетик ичимлик, кофе, пишлоқ ва колбасали омлет – бу мени атлетлардек югуртиради”, деган эди Жейми интервьюларидан бирида.
Вардининг майдондаги яна кўплаб ҳаракатлари диққатга сазовор. Масалан, у баъзан ўйин олдидан рақиб ҳимоячиларнинг она тилидаги сўкиниш сўзларини ўрганар экан. У майдондаги кичик деталларга ҳам эътибор берар эди. Варди мухлисларни ҳам асабийлаштирар, айниқса “Тоттенҳэм” тарафдорларини ғашига тегишни ёқтирарди. Гол нишонлашда ёки алмаштириш чоғида у АПЛда бир чемпионлиги борлигини эслатиб, “Тоттенҳэм”да эса бу кўрсаткич нолга тенг эканлигига ишора қиларди.
2025 йил май бошларида “Лестер” – “Саутгемптон” ўйини пайти ҳакам футболчи билан тўқнашиб йиқилиб тушади. Аммо ўйин давом этиб, “Саутгемптон” ҳужумга ўтади. Варди эса ҳакамнинг олдига югуриб бориб, унинг ҳуштагидан фойдаланади ва ўйинни тўхтатади. Бу ҳаракатларни фақат Варди қила олади!
Вардининг келажаги қандай?
Варди “Лестер”ни тарк этди, аммо футболни эмас. 38 ёшли форвард яқин орада футболни тарк этиш ниятида эмаслигини билдирди:
“Оёқларим ҳаракатга тайёр экан, мен ҳам ўйнайман”.
Унинг MLSга ёки машҳур актёр Райан Рейнолдсга тегишли бўлган “Рекшем” клубига ўтиш эҳтимоли бор. Шунингдек, карьерасидаги илк жамоа — “Шеффилд Уэнздей”га қайтиши ҳам мумкин. Қайси жамоада ўйнамасин, Жейми Варди аллақачон тарихга кириб бўлди.
Жейми Варди — футболнинг энг илҳомлантирувчи ҳикояларидан бири. У шунчаки яхши ҳужумчи эмас — ўз исмини тарихга ёзган, оддий одам учун умид рамзига айланган афсонадир. Сабаби у кўча футболини Премьер Лигага олиб кира олган ҳужумчидир.
Жамшидбек Маҳмудов
Изоҳ (0)