“Манчестер Юнайтед” ярим ҳимоячиси Бруну Фернандеш Саудия Арабистони чемпионатига ўтиш вариантини жиддий кўриб чиқмоқда.
Журналист Бен Жейкобснинг хабар беришича, футболчининг агенти Мигел Пиню ҳафта бошида Риёдга бориб, “Ал-Ҳилол” вакиллари, жумладан клуб президенти Фаҳад бин Нафал билан музокаралар ўтказган. Футболчига яқин манбалар музокара ижобий якунлангани ва томонлар трансфер борасида келишувга эришганини билдирган.
“Ал-Ҳилол” Клублар ўртасидаги Жаҳон чемпионати бошланишидан олдин бир қанча катта трансферларни амалга оширишни истамоқда. Шунинг учун улар Бруну Фернандешдан пайшанбагача жавоб беришни сўрашган. Сўнгги 48 соат ичида футболчининг розилигини олиш учун фаол ҳаракатлар амалга оширилган.
Айни пайтда “Ал-Ҳилол” томондагилар Бруну Фернандеш бу таклифни рад этмаганини тасдиқлаган. Бироқ “Манчестер Юнайтед” позицияси қатъий — клуб сардорини қўйиб юборишни истамаяпти.
Маълумот учун, Фернандеш жорий мавсум АПЛ доирасидаги 36 учрашувда майдонга тушиб, ўз ҳисобига 6 та гол ҳамда 10 та ассист ёздириб қўйган. Футболчининг манкунианликлар билан шартномаси 2027 йилнинг ёзига қадар амал қилади. Transfermarkt портали Брунунинг қийматини 55 миллион еврога баҳоламоқда.
Изоҳ (0)