Дунё ва ўзбек спортига оид 29 ноябрь тонгининг энг муҳим хабарлари дайжести билан танишинг.
Ўзбекистон
«Турон» клуби президенти вазифасидан озод этилди
Суперлига сўнгги тури доирасида кечган «Турон» — «Андижон» учрашувидаги кейин яйпанликлар клуби раҳбарияти ва таъсисчилари иштирокида йиғилиш бўлиб ўтган. Йиғилиш натижасига кўра, клуб президенти Абдуваҳоб Аҳмадалиев ўз аризасига кўра эгаллаб турган лавозимидан озод этилган.
Токио Олимпиадаси совриндори «Катта дубулға»да бронза медалига эга чиқди
Ўзбекистонлик дзюдоси Давлат Бобонов БААнинг Абу-Даби шаҳрида бўлиб ўтган «Катта дубулға» таснифига кирувчи мусобақада бронза медалига эга чиқди. Бобонов бронза учун кечган ҳал қилувчи баҳсда франциялик Францис Дамени енгди ва совриндорлар қаторидан жой олди.
Бу орқали ўзбекистонлик спортчи 500 рейтинг очкосига эга бўлди. Бобонов ярим финалда россиялик Мансур Лорсановга ютқазиб қўйганди.
Аввалроқ ушбу мусобақада Ҳикматуллоҳ Тўраев кумуш медалига эга чиққанди.
Жаҳон
«Олтин тўп» соврини бугун ўз эгасини топади
Париждаги «Театре дю Шатле»да «Олтин тўп»—2021 совринини топшириш маросими бўлиб ўтади. Маросим Тошкент вақти билан 29 ноябрдан 30 ноябрга ўтар кечаси 00:30 да бошланади.
Соврин учун 30 нафар номзод эълон қилинган. Бироқ асосий даъвогарлар сифатида Лионель Месси («ПСЖ»), Роберт Левандовски («Бавария») ва Жоржиньо («Челси») кўрилмоқда.
Эслатиб ўтамиз, 2020 йилда коронавирус пандемияси сабаб «Олтин тўп» топшириш маросими ўтказилмаган эди.
IFFHS йилнинг энг яхшиларини эълон қилди
Халқаро футбол тарихи статистикаси федерацияси (IFFHS) 2021 йилнинг энг яхши футболчиси ва дарвозабони номини маълум қилди.
Энг яхши футболчи сифатида «Бавария» форварди Роберт Левандовски эътироф этилган. Польшалик футболчи 150 очко тўплаган. Иккинчи ўринда «ПСЖ» форварди Лионель Месси (105) қайд этилган бўлса, «Челси» ярим ҳимоячиси Жоржиньо (40) кучли учликка якун ясаган.
IFFHS талқинига кўра 2021 йилнинг энг яхши футболчилари:
- Роберт Левандовски («Бавария») — 150 очко
- Лионель Месси («ПСЖ») — 105
- Жоржиньо («Челси») — 40
- Кевин де Брюйне («Манчестер Сити») — 35
- Муҳаммад Салоҳ («Ливерпуль») — 20
- Килиан Мбаппе («ПСЖ») — 20
- Криштиану Роналду («Манчестер Юнайтед») — 15
- Нголо Канте («Челси») — 10
- Жанлуижи Доннарумма («ПСЖ») — 10
- Эрлинг Ҳоланд («Боруссия Д») — 5.
Шунингдек, кучли бешликдан «Астон Вилла» футболчиси Эмилиано Мартинес (25) ва «Атлетико» етакчиси Ян Облак (20) ўрин олган.
Серхио Рамос қайтди, Неймарда эса жиддий жароҳат
2021 йилги ёзги трансфер ойнасида эркин агент мақомида «ПСЖ» сафига ўтган Серхио Рамос Лига 1 16-тури доирасида кечган «Сент-Этьен»га қарши баҳсда дебют қилди. Ҳимоя жамоага келганидан бери жароҳатидан қутулолмаётганди. Рамос учрашувда тўлиқ ҳаракат қилган.
Мазкур баҳсда «ПСЖ» ҳужумчиси Неймар рақиб билан бўлган тўқнашувдан кейин болдир ошиғини жиддий шикастлаб олди. Бу жароҳатдан кейин Неймар майдондан олиб чиқиб кетилди. Ҳозирча жароҳат қай даражада жиддий экани маълум эмас.
«Тикланишни бошлайман. Афсуски, бу спортчи ҳаётининг бир қисми. Энди бошни кўтариш ва олдинга интилиш керак. Янада кучлироқ бўлиб қайтаман», — дея пост қолдирди Неймар жароҳатдан кейин.
«Палмейрас» — Либертадорес Кубоги соҳиби
Финалда «Фламенго»ни таслим этган «яшил-оқлар» ўз тарихида учинчи марта ва кетма-кет иккинчи бор ушбу совринга эга чиқди. Ўтган мавсум «Палмейрас» «Сантос»ни енгиб, кубок эгасига айланганди.
Шу тариқа клублар ўртасидаги ЖЧ—2021 мусобақасининг барча иштирокчилари номи маълум бўлди. «Палмейрас»дан ташқари унда «Челси» (Англия), «Ал-Ҳилол» (Саудия Арабистони), «Ал-Аҳли» (Миср), «Монтеррей» (Мексика), «Окленд» (Янги Зеландия) ва «Ал-Жазира» (БАА) жамоалари қатнашади. Мусобақа 2022 йил бошида БААда бўлиб ўтади.
Изоҳ (0)